Read Kalanga Makungulupeswa 20 Bible Online

Makungulupeswa 20 - Kalanga bible

Makungulupeswa 20

¹Nkumbi we zhambi n'dadi, busukwa go gwisanya, koga iye unolaladziswa nazo aazotjenjela.

²Bushongola gwa mambo gonga tjibombo tje shumba, iye uno ntanga e n'gwadzisa moyo butjilo gugwe gumu mbatsha.

³Kuna gudzo mu nthu kube kule ne kukwebakwebana, koga tjilengwe tjimwe ne tjimwe tjowokwebakwebana.

⁴Simbe aitolima mu tjibaka tje ndimo, inowoshaka ikashaya tjainovuna mu zhizha.

⁵Mano mu moyo we nthu anonga vula imu tshime lakangina, koga nthu una hwisiso unoyitjela.

⁶Bathu banjinji bana babanoti banobagalabgwe, koga ndiyani ungawana iye unoyi una malebeswa?

⁷Nlume wakalulwama unozwibhata ne thambunuko, kwakakombolegwa bakololo babe banotobela zila iye!

⁸Mambo unogala pa tjigalo tje kusumikilisa unowulusa bubi gose nge mesho awe.

⁹Ndiani ungati, “Nda thama moyo wangu ukabe mbuyanana, ndi mbuyanana andina tjibi”?

¹⁰Zwiyelo zwakasiyana ne zwilizanyo zwakasiyana, zose zoshimisa kuna Yahwe.

¹¹Na iye mwana unozwizibisa nge zwiyito zwizwe, kene zwili zwibuyanana kene zwakalulwama.

¹²Zebe inohwa ne zhisho linobona, zose zwakasikwa ndi Yahwe.

¹³Uside hwope kuti ndizo usibe nshayi; zhula mesho awo ngono unowana zwinojiwa zwinjinji.

¹⁴“Kwakabipa, kwakabipa,” koleba ntengi, koga ha edwa ipapo unozwiloba ifuba.

¹⁵Kuna golide ne thundu ye mabgwe e themba ipezhugwi, koga milomo inoleba zibo mibuya kupinda zose.

¹⁶Mutole tjiambalo tje nthu unolipila ntaya, ngaabe mbatshi we bataya.

¹⁷Zojiwa zwawang'wa nge bupitipiti zo zipila nthu, koga kudwa ipapo nlomo uwe unowozhala lushale.

¹⁸Mano anothumbidziwa nge kulangana, musa ngwa wa layiwa.

¹⁹Iye unoyenda e nyeya unodusa zwikohwa, ndizo usitongozwihwananya ne nthu unolebanya.

²⁰Iye unolonga tate babe kene mmeyabe bhiso, luvone gugwe gowodzimiwa mu zhalima lakati zwititi.

²¹Fumwa yakawang'wa ngolibilidza, ayitowokombolegwa kubupelo.

²²Usitongoti, “Ndowo bgwiliza bubi ku bubi,” milila Yahwe, banowokubhatsha.

²³Zwiyelo zwakasiyana zoshimisa kuna Yahwe, ne zwiyelo zwe manyepkhwa azwizolulwama.

²⁴Thambo dze nthu dzolawugwa ndi Yahwe, ndizo nthu ungahwisisa zila iye tjini?

²⁵Kumbatsha mu nthu kungoleba koga eti, “Kwakayengemala,” ekokumbula shule asatongo alakana asathu ajalo.

²⁶Mambo wakatjenjela uno wulusa batjinyi, ngono kabakwiya nge gumbgwana.

²⁷Meya ye nthu luvone gwa Yahwe, gunoshakisisa mukati kukwe kose.

²⁸Ludo ne kugagwabgwe kotjengeta Mambo, ne bugalo gugwe gosimisiwa nge ndulamo.

²⁹Gudzo le bazhuzha isimba labo, koga bubuya gwe bathuntana mavudzi abo matjena.

³⁰Lobgwa kunokubadza kotata bubi, shamu dzosuka mukati kwe nthu.