Read Kalanga Makungulupeswa 21 Bible Online

Makungulupeswa 21 - Kalanga bible

Makungulupeswa 21

¹Moyo wa mambo lukoba gwe vula gumu luboko gwa Yahwe; banogushandulila kumwe ne kumwe kwa banoshaka.

²Zila imwe ne imwe ye nthu yakalulwama mu kubona kukwe, koga Yahwe banokala moyo.

³Kuthama ndulamo ne kutambunuka, koamutjilika kuna Yahwe kupinda tjibhayilo.

⁴Mesho anozwikudza ne moyo unozwida luvone gwe babi, zwibi.

⁵Mano ebana moyonlefu nge lebeswa anotungamilila ku mbuzilo, koga bose bana phupu bano wana bushayi.

⁶Kuwana fumwa nge lulimi, konga busi gunopinda kakale i dati le lufu.

⁷Phipiti ye babiibi inowobatshwayilila kutjena, ngobe banolamba kuyita tjakatambunuka.

⁸Zila ye nthu una nlandu yakaleleka, koga mazwibhato e nthu mbuyanana akalulwama.

⁹Ku koyita kwazo kugala mu ndzibo we denga le ng'umba, pana kugala mu ng'umba ina nkadzi una zhoba.

¹⁰Meya ye mbiimbi inoda zwibiibi, n'galidzani naye aatobona ngoni mu mesho awe.

¹¹Ha unodada e lobgwa shamu, tjilengwe tjotjenjela, ha ntjenjedu elayiwa, unowana luzibo.

¹²Nlulwami unolingisisa ng'umba ye mbiimbi, kaligila mbiimbi mu golomodzo.

¹³Iye usingateedze tjililo tje nshayi, iye unowoti ha e mimila kukashaya unonteedza.

¹⁴Tjipo tjinopigwa mu ikohwa tjodzima shungu, ne tjizwimba nlomo tjinodusigwa mu apkhwa tjodzima kugwadza moyo kukulu.

¹⁵Ha kutambunuka kushingwa, ko shathisa balulwami, koga i golomodzo ku bashingi be mbipo.

¹⁶Nthu unobhuda mu zila ye kuhwisisa, unowonyaluluka mu gubungano le bafi.

¹⁷Iye unoda mizipo unowobe nshayi, iye unoda nkumbi we zhambi ne mafuta aatofuma.

¹⁸Mbiimbi unolipila nlulwami, ne basingagalemoyo bano lilipila bakatambunuka.

¹⁹Koyita kugala mu tjilambanyika, pana kugala ne nkadzi unazhoba edziidza.

²⁰Mu ng'umba ye ntjenjedu ko gala fumwa nji ne mafuta, koga tjilengwe tjoja tjipedza kose.

²¹Iye unoshaka ndulamo ne buthu, unowana butjilo ne gudzo.

²²Nthu wakatjenjela unonginilila nzi nkulu we wakasima, kaligila pasi matizhilo abanogalabwe muali.

²³Iye unotjengeta nlomo uwe ne lulimi gugwe, unozwidusa mu mbatsha.

²⁴“Ndadi” i zina le unozwikudza, unozwida unoshinga zwithu nge kuzwikudza kukwe.

²⁵Simbe inobulawa nge njemulo dzayo, ngobe maboko awe anolamba kushinga.

²⁶Zhuba lose mbiimbi unoshwa eyemula, koga nlulwami unopa asingatjibe.

²⁷Tjibhayilo tje mbiimbi tjoshimisa, ngono zwinyanya ha etjizhisa nge nkumbulo wakabipa.

²⁸Ntendeki we manyepkhwa unowoloba, koga dama le nthu unoteedza lowogalila tjose.

²⁹Nthu mbiimbi unokukutadza tjiso, koga nthu wakatambunuka una njele mu zila dzidze.

³⁰Akuna butjenjedu, akuna hwisiso ne gumbuludzo, zwingakulila Yahwe.

³¹Mbizi inolulwamisigwa zhuba le ngwa, koga kukunda kodwa kuna Yahwe.