Read Kalanga Makungulupeswa 22 Bible Online

Makungulupeswa 22 - Kalanga bible

Makungulupeswa 22

¹Zina buya lakafanilo shalugwa kupinda fumwa njinji, ne ludo gopinda siliva ne golide.

²Bafumi ne bashayi banoshangana pathu pang'ompela, Yahwe ndibo bakabasika bose.

³Nthu wakatjenjela unobona mbatsha kabgwata, koga tjilengwe tjodwilila koga tjiwila mu mbatsha.

⁴Mbhayilo we kuzwiyesapasi ne kutja Yahwe, ifumwa ne gudzo ne butjilo.

⁵Mihwa ne matati amu zila ye basakalulwama, iye unozwitjengeta unowobe kule nazo.

⁶Diya mwana zila yaakafanila kutobela, ndizo ha akula aatobhuda muili.

⁷Nfumi unobusa nshayi, ne unoadzimiwa nlanda we wan'adzima.

⁸Iye unodzwala mbipo unowovuna tjiga, ngono shamu ye bushongola gugwe inowokong'wa.

⁹Iye una lubu unowokombolegwa, ngobe unokwamulana tjiwunga tjitje ne bashayi.

¹⁰Tatila ndadi kutjena, ngono kukwebakwebana kowopela, ne kukayikana ne tshambilidzo zowoma.

¹¹Iye unoda moyo mbuyanana, ne unoleba nge bubuya, unowobe nzwalani wa Mambo.

¹²Mesho a Yahwe anotjengeta luzibo, koga banolasha matama e basingagale moyo.

¹³Simbe inoti, “Kuna shuba kuzhe! Ndowo bulawa mu zila!”

¹⁴Nlomo we nkadzi we bamba i gomba lakangina, iye wakagwadzigwamoyo ndi Yahwe unowowila mu lili.

¹⁵Bulengwe gwakasungiligwa mu moyo we mwana, koga shamu ye kunlaya inogudusila kutjena naye.

¹⁶Iye unotshambilidza bashayi kuzwipaphidzila fumwa, kene kupa bafumi unowobe nshayi nge kukwe.

¹⁷Teya zebe uhwe matama e wakatjenjela, ube ubhulutana luzibo gwangu;

¹⁸ngobe kowokushathisa ha ugala nazo mu moyo uwo, kakale zwigale zwili pejo ne nlomo uwo.

¹⁹Kuti kugalabgwe kuko kube muna Yahwe, ndakuzibisa izo nasi, iwe dumbu.

²⁰Apa andizokukwalila makungulupeswa ali makumi matatu anokumbuludza ne luzibo kene,

²¹kukulakidza tjakatambunuka tjili malebeswa, ndizo kuti upe bakakutuma shandulo ye malebeswa?

²²Usitolele nshayi, ngobe ali nshayi, kene kutshamba unosheta mu lubazhe,

²³ngobe Yahwe banowobamila, kabuya katjinyidzila butjilo ibabo banobatjinyidzila.

²⁴Usitongozwizwadzanya ne nthu unoda gala akagwadzamoyo, kene ukayenda ne nthu una shungu,

²⁵udwa uzwidiya zila dzidze, udwa uzwiwana wawila mu dati.

²⁶Usitongobe mmwe we banogadzabgwe kupa, bezwisungila zwikoloto.

²⁷Ha usina tjimwe tjaunga lipa nditjo, unotolelegwani thobo dzidzo kusi kuko?

²⁸Usitongodusa n'gathu wa ntolo wakathamiwa na botate babo.

²⁹Unobona nthu unyambi mu nshingo uwe kene? Unowoma mbeli kwa bomambo, aangame mbeli kwe bathu basina ntutshi.