Read Kalanga Makungulupeswa 23 Bible Online

Makungulupeswa 23 - Kalanga bible

Makungulupeswa 23

¹Ha ungagala pasi u ja ne mbusi, uyele njele tjimbeli kuko,

²ubige mpanga pa hwulo dzidzo ha uli nthu unoda ja kwazo.

³Usiyemule zwinamunamu zwizwe, nekuti zojiwa zwinotjebela.

⁴Usitongo zwinyadza nge kushaka fumwa, tjenjela uzwidzibe mu nkumbulo uwoyo.

⁵Ha uyilashila mesho awo, ibile ya yenda, tjinyolotjo ya milidza mapapilo, iwuluka se dzu liwulukila zhuzhugwi.

⁶Usije zojiwa zwe nthu unonyimana, usiyemule zwinamunamu zwizwe,

⁷ngekuti unonga zwaanoalakana mu moyo. Unokudwa eti “Ija u ng'we!”, Koga moyo uwe usinga jalo.

⁸Unowothwa kushomanana kwawaja, ukabe wazanisa matama awo mabuya.

⁹Usilebelekele mu zebe dze tjilengwe, ngobe unowolingila pasi butjenjedu gwe matama awo.

¹⁰Usi duse n'gathu wa ntolo, kene ukangina mu minda ye siyang'wa,

¹¹ngobe Ntjidzi wabo wakasima; unowobamilila mu ndebo dzabo nawe.

¹²Moyo uwo ngawude kulayiwa, ne zebe iyo iteedze matama e luzibo.

¹³Usiletjedze kutjemela mwana, ha unloba nge shamu, aangafe.

¹⁴Ha unloba nge shamu unogwila kuti asingine mu lufu.

¹⁵Mwanangu, ha moyo uwo wakatjenjela, moyo wangu unowoshathabo.

¹⁶Meya yangu inowopembela, ha nlomo uwo uleba tjakalulwama.

¹⁷Moyo uwo usitongo yemula batjinyi, koga dwilila mu kutja Yahwe zhuba lose.

¹⁸Malebeswa wose mbhayilo uyapo ne kugalabgwe kuko akutowothubugwa.

¹⁹Ihwa mwanangu, kakale u tjenjele, kakale ulonge moyo uwo mu zila yakatambunuka.

²⁰Usibe mmwe we banogungila nkumbi we zhambi, kene pakati kwe magovu baji be nyama;

²¹ngobe tjidakwa ne govu banowobe bashayi, ne hwope dzowombadza nthu makandana.

²²Teedza tate babo bakakuzwala, kakale usilingile mmeyabo pasi ha batjikwegula.

²³Tenga lebeswa, usitongo litengesa, tenga butjenjedu, ndayo ne hwisiso.

²⁴Tate be wakalulwama banowoshatha kwazo, iye unozwala nkololo wakatjenjela unowonshathila.

²⁵Tate babo na mmeyabo ngabashathe, nkadzi wakakuzwala ngaashathe.

²⁶Nkololo wangu, undipe moyo uwo, ne mesho awo ngaabone zila dzangu.

²⁷Ngekuti fukula i gomba lakangina, ne bamba i tshime lakamanikana.

²⁸Unolalila se ntoleli epaphidza kusagagwabgwe mu balume.

²⁹Ndiani una mbatsha? Ndiyani una buyendasi? Ndiyani una phipiti? Ndiyani unong'ong'ola? Ndiyani wakadusigwa mbonje suli? Ndiyani una mesho mashabashaba?

³⁰Ndiibabo banogalisa mu nkumbi we zhambi, ndiibabo banoyenda beshaka nkumbi we zhambi wakashanganyiwa.

³¹Usilinge nkumbi we zhambi ha uli nshaba, ha ubayima mu bhepe, usodzoloka mu hwulo.

³²Gwe bupelo unoluma se nyoka, unoluma se thumbi.

³³Mesho awo anowobona mazhangaladzimu, ne nkumbulo uwo unowoleba mazhuluzhulu.

³⁴Unowonga nthu wakayizela mu gungwa kene nthu wakayizela pezhugwi kwe bhango le ikepe.

³⁵Unowoti, “Bakandiwomba, koga andizokubala, bakandiloba, koga andizohwila. Ndowomuka lini? Ndowoshaka kung'wa kakale?”