Read Kalanga Makungulupeswa 24 Bible Online

Makungulupeswa 24 - Kalanga bible

Makungulupeswa 24

¹Usiyemule bathu babiibi, kene kuyemula kube nabo,

²ngobe mikumbulo yabo inoluka phipiti, ne milomo yabo inolebazwakabipa.

³Nge butjenjedu ng'umba inobumbiwa, nge hwisiso inothumbidziwa,

⁴ne luzibo ng'umba dzi mukati dzozhadziwa, ne thundu inoguta yakanaka.

⁵Nthu wakatjenjela wakasima kupinda una matatabuko, ne nthu una luzibo unopinda unasimba,

⁶ngobe nge kukumbuludziwa nge butjenjedu ungatangisa ngwa, ne pana bakumbuludzi banjinji kuna kunda.

⁷Butjenjedu gu pezhugwi kwazo mu tjilengwe, ku lubazhe atjitozhula nlomo watjo.

⁸Iye unoluka mano e kuthama mbipo, unowodang'wa kuyi nthami we zwibi.

⁹Kuluka maano e bulengwe tjibi, ne ndadi unoshimisa ku bathu.

¹⁰Ha upela meya zhuba le kudziyila, simba lilo ishomanana.

¹¹Sunungula ibabo banoyisiwa ku lufu; udzibile banotshatsharikila kunobulawa.

¹²Ha uti, “Bonani, tabe tisingakuzibe ikoku,” apa iye unokala moyo aatokubona kene? Apa iye unotjengeta meya iyo aatokuziba kene, apa aatolipa nthu kunoyendidzana ne mishingo iye kene?

¹³Nkololo wangu ija butji, ngoti gwakalulwama, ne butji gwe mape gokuzipila.

¹⁴Ziba kuti butjenjedu gwakajalo ku meya iyo, ha uguwana mbhailo uyapo, ne njemulo dzidzo adzinga kolomoke.

¹⁵Usilalile bugalo gwe wakalulwama se nthu mbiimbi, usitongo nginilila nzi uwe,

¹⁶ngobe nlulwami unowa katendeka, ngono kamuka kakale, koga bakabipa banowiswa nge mbatsha.

¹⁷Usitongo shatha ha tjita tjiwa, kakale moyo uwousipembele ha e kuthiwa,

¹⁸Yahwe bakadwa bebona ngono kube kusingabashathise, bebe beshandusa bushongola gwabo kunli.

¹⁹Usitongo zwidziyidza ngekwe banoshinga bubi, kakale usiyemule babi,

²⁰ngobe nthu mbiimbi aana mbhayilo, luvone gwe mbiimbi gowodzimiwa

²¹nkololo wangu, itja Yahwe na mambo, kakale usishete kuhwa mmwe wabo,

²²ngobe mbatsha kudwa kubali dzingazha tjinyolotjo, ndizo wali ndiyani unoziba mbatsha dzabanga zhisa?

²³Zwilebo ezwi naizobo nge zwe batjenjedu. Kushalawula bathu mu kusumikilisa akuzolulwama.

²⁴Iye unodwa mbiimbi eti, “Auna nlandu,” unowolongwa bhiso nge bathu, ka kashimiwa nge njudzi,

²⁵koga ibabo banotjemela babiibi banowobe ne shatho, makombolelo akanaka anobawila.

²⁶Iye unopa shandulo yakalulwama, unoputa milomo.

²⁷Lulwamisa nshingo uwo kuzhe, lulwamisa tjimwe ne tjimwe mu nnda, kudwapo ukobaka ng'umba iyo.

²⁸Usibe ntendeki ngekwe mbakidzani kusina tjimwe, kakale usitongo tjebela nge nlomo uwo.

²⁹Usitongoti, “Ndowonthamila sekwa akandithamilabo, ndowobgwilizila nthu kuyendidzana ne tjaakathama.”

³⁰Ndaka pinda pa nnda we simbe, pa nnda we zhambi we usina nkumbulo,

³¹wakabe una matenjana emihwa pamwe ne pamwe, pasi kuli zhele dishwa, ne luswingo gwawo gwe mabgwe gwakawa.

³²Ipapo abona aalakana ngekwako, alinga aamutjila ndayo.

³³Hwope shomanana ne tshung'ayila kushomanana, ne kufukata maboko kunyaluluka,

³⁴ne bushayi gowozha kukuli se ntoleli, ne ku sheta se nlume wakasenga zwibhayano.