Read Kalanga Makungulupeswa 25 Bible Online

Makungulupeswa 25 - Kalanga bible

Makungulupeswa 25

¹Iyawa naiwobo makungulupeswa a Solomoni akati balume ba Hezeki'ah mambo we Juda kaayedza.

²I gudzo le Ndzimu kusumbika zwithu, koga gudzo la bomambo wushakisisa zwithu.

³Se kudzimu kuli zhuzhugwi, ne shango yakangina, saikoko mikumbulo ya bomambo ayitoshakisisika.

⁴Dusa manye mu siliva, kuti nthuli abe ne tjinobumba tjija,

⁵dusila kutjena babiibi mbeli kwa mambo, ndizo tjigalo tjitje tje bumambo tjowothumbidzigwa mu ndulamo.

⁶Usitongozwikudza mu mesho a mambo, kene ukazwibiga mu mamo e bakulu,

⁷ngobe koyita kuti udwiwe kuyi, “Tathila ngeno,” pana kuti u yisiwe pasi mbeli kwe nkololo wa mambo. Tjawabona ne mesho awo

⁸usitongo tjimbidza watjizhisa ku lubazhe, ngobe unowothama tjini mu bupelo, ha mbakidzani uwo ekubhatisa shoni?

⁹Lebelekani ndebo yenyu ne mbakidzani uwo, kakale musilebululane,

¹⁰kungadwa kukati iye unomuhwa kamubhatisa shoni, ngono kulengudzika kuko kukasipele.

¹¹Dama linolebgwa tjibaka tjakafanila, lofanana ne maapuli e golide mu ndilo ye siliva.

¹²Se ng'ina le golide kene ndalama ye golide konga se ntjemeli wakatjenjela ku zebe inohwa.

¹³Se kapuku tjinotothola mu tjibaka tje kuvuna ntumwa we malebeswa kuna ibabo banontuma, nekuti uno nayisa meya ya botetshi babe.

¹⁴Nthu uno babgwa ne tjipo tjaasingape unonga makole ne phepo asina vula.

¹⁵Mbusi unotubugwa nge bana moyonlefu, ne lulimi bunyolo govuna fupa.

¹⁶Ha wawana butji gwe nyutji, uje kwaka ku lizana, ngobe ungadwa ukazwimbigwa ube uthwa.

¹⁷Usiwolobele kugala wakayenda ku nzi we mbakisani uwo, ngobe ungadwa kanyala nge kuko ebe ekubenga.

¹⁸Nthu unopa butendeki gwe manyepkhwa ngekwe mbakidzani uwe, unonga swimbo kene bukanu kene nsebe unopitsha.

¹⁹Kugalabgwe mu nthu usingagalemoyo mu tjibaka tje manikano konga zhino lakabola kene gumbo lakalewuka.

²⁰Nthu unombila njimbo moyo una buyendasi unonga nthu unombula zwiambalo mu zhuba linopota, kene unonga vinega yadigwa mu banga.

²¹Ha mbengi uwo anazhala, umpe zojiwa aje, ne ha ananyota umpe vula ang'we,

²²kujalo unobe wabutitika masimbe anopisa mu nsholo uwe, ndizo Yahwe banowokupa mbhayilo.

²³Phepo ye bunandzwa inozhisa vula, ne lulimi gunonyeya gozhisa tjiso tjizhele bushongola.

²⁴Koyita kugala pa n'dzibo we denga le ng'umba pana kugala mu ng'umba ne nkadzi una zhoba.

²⁵Thawu dzakanaka dzinodwa kulekule, dzonga vula inotothola ku meya ina nyota.

²⁶Nthu lulwama unosedzela babi, unonga dziba lina dope kene nsenya wakadzongeka.

²⁷Akuzonaka kuja butji bunjisa, kene kuda kukudziwa kwazo.

²⁸Nthu usingatubule kuzwidziba, unonga nzi nkulu wakanginiligwa ube usiyiwa usina luswingo.