Read Kalanga Makungulupeswa 26 Bible Online

Makungulupeswa 26 - Kalanga bible

Makungulupeswa 26

¹Koga se kapuku mu tjilimo ne vula mu nsi we kuvuna, gudzo alitofanila tjilengwe.

²Koga se zhwazho iwuluka, se nyenganyenga i phururuka, bhiso le suli alitoshinga.

³Rwabha ino loba mbizi, matomu anolongwa mu donki, ne shamu inolingisana ne ikamba tje zwilengwe.

⁴Usidabile tjilengwe nge bulengwe, ngobe ungadwa ukafanana natjo.

⁵Dabila tjilengwe nge zila ye bulengwe gwatjo tjingadwa tjikabe ntjenjedu mu mesho atjo.

⁶Iye unotumila ndayidzo nge luboko gwe tjilengwe, unozwithubula makumbo ne kung'wa phipiti.

⁷Gungulupeswa mu milomo ye zwilengwe,, longa makumbo e tjilema asakasima.

⁸Koga se nthu unosungila bgwe mu tjirakantswane, ndiko kunoyita nthu unopa tjilengwe gudzo.

⁹Koga se miwa unobhaya luboko gwe tjidakwa, konga gungulupeswa mu nlomo we tjilengwe.

¹⁰Koga se mposi we misebe unokubadza mmwe ne mmwe, unonga nthu unotapa tjilengwe tjinopinda kene tjidakwa.

¹¹Koga se mbgwa inobgwilila ija matho ayo, tjilengwe tjobgwilulula bulengwe gwatjo.

¹²Unobona nthu unozwidwa eti wakatjenjela? Tjilengwe tjina kugalabgwe panaiye.

¹³Tjilengwe tjikati, “Kuna shumba mu zila! Kuna shumba mu zila dze nzi!”

¹⁴Se dendele lipoteleka mu mabante alo, ndiko kunoyita simbe mu bulawo gwayo.

¹⁵Simbe inolonga luboko gwayo mu ndilo, koyinyadza kubuza luboko ilonga zojiwa mu nlomo.

¹⁶Simbe inozwidwa iti yakatjenjela, kupinda bathu bali banotendeka bangadabila nge nkumbulo mbuya.

¹⁷Iye unongina ngwa isi iye, unonga nthu unobhata mbgwa inopinda nge zebe.

¹⁸Koga se mpengo unoposa misebe, inothuta,

¹⁹ndiko kunoyita nthu unotjebela mbakidzani uwe eti, “Ndozana zwangu!”

²⁰Ha kusina hwuni moto unodzima, ne pasina nnyeyi ngwa inopela.

²¹Se masimbe ku zwisikalala zwinothuta ne hwuni ku moto wakajalo n'gwisanyi mu kumusa ngwa.

²²Matama e nnyeyi anonga zojiwa zwinozipa, zoyenda nge ndungululo dze mbili.

²³Se hali ye ntapkhwi yakakuyungiwa nge siliva, milomo inosodzoloka ina moyo wakabipa.

²⁴Mbengi unotjengedza nge zwilebo zwizwe koga akasumbika kutjebela mu moyo uwe,

²⁵ha elebeleka zwibuya, usidume tjaanoleba, ngobe kuna zwinoshimisa zwili kutendeka mu moyo uwe,

²⁶nenguba lubengo gugwe gwakasumbikwa nge butjengedzi, bubi gugwe gowobhudila patjena ku gubungano.

²⁷Iye unotsha gomba unowowila mu lili, ne bgwe lowokungulukila kuna iye wakatanga kulikunguludza.

²⁸Lulimi gunonyepa gobenga ibabo bagwakubadza, ne nlomo unotjengedza unopaladza.