Read Kalanga Makungulupeswa 27 Bible Online

Makungulupeswa 27 - Kalanga bible

Makungulupeswa 27

¹Usitongo babgwa nekwe mangwana, ngobe autoziba kuti la nasi lowoshwa la zhisani.

²Ima mmwe nthu akukulumbidze, kusi ne nlomo uwo; nthu upoga, kusi iwe.

³Bgwe lolema, nsetje ntolo, koga kuthumulana kwe tjilengwe kolema kupinda bubili gwazo.

⁴Bushongola bukukutu, kugwadzamoyo ko kulila, ngono ndiani ungamidzana ne fupa?

⁵Kutjemelela patjena kopinda ludo gwakasumbikika.

⁶Mabanga awapiwa ne nkwinya anoyita pana kuputiwa nge tjita kanjinji.

⁷Wakaguta unolamba butji, koga unazhala unoti ne kunobaba kose kozipa.

⁸Nlume unosiya nsha uwe, unonga nyuni, inowulukila kule ne shaka layo.

⁹Mafuta ne zwinonuhwilila zogutsha moyo, kushathisa kwe nzwalani kodwa mu moyo ekumbuludza.

¹⁰Nzwalani uwo ne nzwalani wa tate babo usibalashe, Usitongo yenda ku nzi we mwana wa tate babo zhuba le manikano. Mbakidzani uwo upejo unoyita pa mwana wa tate babo ukulekule.

¹¹Tjenjela nkololo wangu, u shathise moyo wangu, kuti ndishandule iye unondigongobola.

¹²Nthu wakatjenjela unobona mbatsha kabgwata, koga usina mano unodwilila ewila mu mbatsha.

¹³Mutolele tjiambalo nthu wa zwisunga kulipila ntaya, ha e milila ntaya mu mbhatile thundu.

¹⁴Iye unokombolela mbakidzani uwe nge hwi lipezhugwi, emuka mangwanana, unowotogwa se unolonga bhiso.

¹⁵Vula inona idumbilidza zhuba lose, ne nkadzi unosilinga zofanana,

¹⁶ha uti unondzibisa konga unomisa phepo kene ku bhata mafuta nge luboko gwe luji.

¹⁷Butale gokuswa butale, ne nthu unokuswa umwe nthu.

¹⁸Iye unotjengeta mpaya unowoja zwizwalo zwawo, na iye unotjengeta tetshi uwe unowokudziwa.

¹⁹Semu vula tjiso tjilingisana ne tjiso, saikoko moyo we nthu unolingisana ne nthu.

²⁰Lufu ne Golomodzo azwitotongoguta, ne mesho e nthu aatofa aguta.

²¹Hali inonyawusa ngeye siliva, koga vutho ngeye golide, ngono nthu unozibgwa ngo kudzwa kwaanokudziwa ndiko.

²²Nenguba ungakhwilanya tjilengwe ne mathunde nge nsi mu duni, atjingalashe bulengwe gwatjo.

²³Ziba kwazo tjimo tje ngubi dzidzo, utjengete zwibuya matanga e zwithuwo zwizo,

²⁴ngobe fumwa aitogalila tjose, apa tjiala tje bumambo tjogala kuswikila ku zwizekugwana zose kene?

²⁵Bushwa ha gwa pela, lukulakula gu mela, ne bushwa gumu matombo gukubunganyiwa,

²⁶pkhwizi dzowokuwanila zwiambalo, ne mbudzi dziwanisa mari ethemba ye minda,

²⁷kowobe ne nkaka we mbudzi wakalizana zojiwa zwizo, zojiwa zwe nsha uwo ne kujisa balandakadzi babo.