Read Kalanga Makungulupeswa 28 Bible Online

Makungulupeswa 28 - Kalanga bible

Makungulupeswa 28

¹Mbiimbi unotizha nenguba kusina unotatana naye, koga balulwami bakasimamoyo se shumba.

²Shango ha ina jinyo inobe ne batungamili banjinji, koga ha kuna balume bana kuhwisisa ne luzibo ingagadzikana kwe tjibaka.

³Nshayi unotshambilidza bashayi ivula inona ikuba isiya kusina tjinojiwa.

⁴Ibabo basingatobele nlayo banolumbidza babi, koga ibo banotobela nlayo banogwisana nabo.

⁵Bathu babi abatohwisisa kutambunuka, koga ibo banoshaka Yahwe banonhwisisa kwakapelela.

⁶Nshayi unoyenda zila dzakatambunuka, unopinda mfumi unotobela zila dzakakombama.

⁷Iye unotjengeta nlayo nkololo wakatjenjela, koga nkwinya we magovu unobhatisa tate babe shoni.

⁸Iye unopaphidza fumwa iye nge kuzwalisa mari, unokubunganyila iwoyo una buthu ku bashayi.

⁹Iye unozwina zebe kuti asihwe nlayo ne ntembezelo uwe unoshimisa.

¹⁰Iye unotungamilila bakatambunuka ku zila yakabipa, unowowila mu gomba lile, koga basina nlandu banowobe ne thaka yakanaka.

¹¹Nfumi wakatjenjela muna awe mesho, koga nshayi wakatjenjela, unombonyolola.

¹²Ha balulwami bekunda, kobe ne kushatha kukulu, koga ha batjinyi bemusa nsholo, balume banobgwata.

¹³Iye unosumbika matjinyo awe aatobhudilila, koga iye unoadusila patjena ebuya ealasha unowohwigwa ngoni.

¹⁴Kwakakombolegwa nthu unotja Yahwe tjibaka tjose, koga iye unokukutadza moyo uwe unowowila mu mbatsha.

¹⁵Se shumba inobomba kene bhira ikutjulukila, ndizo zwinoyita mbusi we mbiimbi pezhugwi kwe bashayi.

¹⁶Mbusi usina hwisiso ntshambilidzi we moyo wakabipa, koga unoshima kutjiba unowopaphidza mazhuba awe.

¹⁷Ha nlume e lemegwa ne lopa le nthu waakabulaya, ngaabe ntizhi kuswikila e fa, kushaye unombhatsha.

¹⁸Iye unotjila asina nlandu unowotjidziwa, koga iye we zila dzakaleleka unowowila mu gomba.

¹⁹Iye unolima nnda uwe unowowana zojiwa zwinjinji, koga iye unotobelela zwisina nshingo unowobe ne bushayi bukulu.

²⁰Nthu unogalamoyo unowobe ne makombolelo akawanda, koga iye una phupu dze fumwa haangashaye shamu.

²¹Kushalawula bathu akuzonaka, koga ne bhemu le tjiwunga nthu unowotjinya.

²²Nthu unonyimana unotizhilila fumwa, koga aatoziba kuti kusheta kowonzhila.

²³Iye unotjemela mmwe unowoti shule kadiwa kwazo, kupinda iye unotjebela nge lulimi.

²⁴Iye unotolela tate babe kene mmeyabe, ekoti, “Ikoku atekuli tjinya,” nkwinya we nthu unotjinya.

²⁵Nthu we govu unogwisanya, koga iye unogalamoyo muna Yahwe unowobhudilila.

²⁶Iye unogalamoyo mu nkumbulo uwe tjilengwe, koga iye unoyenda mu butjenjedu unowosungunugwa.

²⁷Iye unopa bashayi aatowosheta, koga iye unosumbika mesho unowowana bhiso.

²⁸Ha babiibi bemusa nsholo, balume banobgwata, ngono ha beloba balulwami banopaphidzika.