Read Kalanga Makungulupeswa 29 Bible Online

Makungulupeswa 29 - Kalanga bible

Makungulupeswa 29

¹Iye unogala e tjemegwa koga ewomesa ntshibha unowotjimbidza akolomodziwa kusina bhatsho.

²Ha balulwami bebusa, bathu banoshatha, koga ha ku busa babiibi, bathu banogomela.

³Iye unoda butjenjedu unoshathisa tate babe, koga iye unozwizwadzanya ne fukula unozwitjinyila fumwa.

⁴Nge kutambunuka mambo unogadzikanya shango, koga iye unoshaka zwipo unoyishakadza.

⁵Nthu unotjengedza mbakidzani uwe unowalila makumbo awe gwanga.

⁶Nthu mbi unobhatshigwa mu tjibi tjitje, koga nthu wakalulwama unomba kapululudza.

⁷Nthu wakalulwama unoziba fanilo dze bashayi, koga nthu mbi aana hanya nazo.

⁸Badadi banopisa nzi nkulu, koga bathu bakatjenjela banodzima bushongola.

⁹Ha ntjenjedu eseka ne tjilengwe, tjilengwe itjo tjopengapenga tjikaseka ngono akuna kunyalala.

¹⁰Bathu banotebula lopa banoshima nthu usina nlandu, ne babiibi banoshaka lufu gugwe.

¹¹Tjilengwe tjodusa bushongola gwatjo gose, koga ntjenjedu unozwibhata.

¹²Ha mbusi e teedza manyepkhwa, makombgwa awe wose anowobe mabiibi.

¹³Nshayi ne ntshambilidzi banofanana, Yahwe banobapa tjedza tje mesho bose.

¹⁴Ha mambo esumikilisa bashayi nge kulizalizana, bumambo gugwe gowothumbidziwa kusingapele.

¹⁵Shamu ne kutjemela zopa butjenjedu, koga mwana usinga tjemegwe unobhatisa mmeyabe shoni.

¹⁶Ha babiibi bali mu mbuso, tjibi tjowanda, koga balulwami banowobona kuwa kwabo.

¹⁷Tjemela nkololo uwo, unowokupa kunyaluluka, unowoshathisa moyo uwo.

¹⁸Pasina bulebesambeli bathu abatozwibhata, koga wakakombolegwa iye unolondolodza nlayo.

¹⁹Nlanda aatotjemeleka nge mahwi koga, nenguba e hwisisa aana hanya nazo.

²⁰Unobona nthu wakatungamidza leba? Tjilengwe tjoyita panli.

²¹Iye unolela nlanda nge kunlema kudwa mu butjetjana, ku bupelo unowowana abe n'galithaka uwe.

²²Nthu una bushongola unomusa ngwa, ne nthu unoda gwadzamoyo unodzwala bubi bunjinji.

²³Mazwikudzo enthu anon'yisa pasi, koga iye wakatebama mu meya unowowana gudzo.

²⁴Nkwinya we mbava unoshima butjilo gugwe, unohwa bhiso, koga aana tjaangaleba,

²⁵kutja nthu hwuteya dati, koga iye uno galabgwe muna Yahwe wakatjengeteka.

²⁶Bali banjinji banoshaka ludo gwe mbusi, koga kudwa kuna Yahwe nthu unowana kutambunuka.

²⁷Nthu usakatambunuka unoshimisa ku nlulwami, koga iye wakatambunuka unoshimisa ku babiibi.