Read Kalanga Makungulupeswa 3 Bible Online

Makungulupeswa 3 - Kalanga bible

Makungulupeswa 3

¹Nkololo wangu, usitongo kangang'wa zwidiyo zwangu, koga ulondolodze milayo yangu,

²ngobe inowokupaphidzila mazhuba ne makole awo e butjilo, inokuzhisila kunyalala kwakapelela.

³Usitongo lashikigwa ne ludo ne malebeswa, uzwisungilile mu ntshibha uwo, uzwikwale mu tjileiti tje moyo uwo.

⁴Ndizo unowowana lubu ne zina buyanana mu mesho e Ndzimu ne e bathu.

⁵Galabgwe muna Yahwe ne moyo uwo wose, usitongobiga mu hwisiso iyo koga.

⁶Mu zila dzidzo dzose unkudze ndizo unotambunudza zila dzidzo dzose.

⁷Usitongozwibona wakatjenjela, itja Yahwe, ufupatatile zwibiibi.

⁸Ikoku kowobe ndapo mu mbili kukanyalulusa mafupa awo.

⁹Kudza Yahwe ne zwaunazo kose ne zwitshwa zwe nnda uwo,

¹⁰ipapo matula awo anowozhala akatebukana, ne makukhwa awo anowotebukana ne nkumbi we zhambi.

¹¹ Nkololo wangu, usitongo lingila pasi kutjemela kwa Yahwe, kene uka nyadziwa ngo kutjemela kwabo,

¹²ngobe Yahwe banotjemela iye wabanoda, sa tate mu nkololo wabo unobashathisa.

¹³Wakakombolegwa iye unowana butjenjedu, ne nthu unowana ku hwisisa,

¹⁴ngobe mukuguwana kopinda kuwana siliva ne mbuzilo yago inopinda golide.

¹⁵Guna themba inopinda ye mabgwana akanaka, akuna tjaungayemula tjingafanidzanyiwa nago.

¹⁶Butjilo bulefu gumu luboko gwago gwe luji, muna gwe lumeshwe kuna fumwa ne gudzo.

¹⁷Zila dzago i zila dzinoshathisa, ne zijana dzago dzizhele kunyalala.

¹⁸Ndiwo nti we bupenyu muna banobhatilila mu guli, ibabo banozwibhatilila muguli banodang'wa bakakombolegwa.

¹⁹Yahwe ne butjenjedu bakasika shango, nge hwisiso bakathama zhuzhugwi,

²⁰ne luzibo gwabo vula ika pubuka, ne makole akaliga khawa.

²¹Nkololo wangu, tjengeta butjenjedu ne njalakang'wa, zwisitongodwa pa mesho awo,

²²zowobe butjilo gwe meya iyo, ne tjinoyemulika tje ntshibha uwo.

²³Ipapo unowoyenda zila iyo wakabakililika ne gumbo lilo alitowokuthiwa.

²⁴Ha unoizela autowotja, ha uizela hwope dzidzo dzowokuzipila.

²⁵Usitongotja tjimwe tjinga kupalusamoyo, kene kulobesiwa kwe batjinyi ha kuzha,

²⁶ngobe Yahwe ndibo banowobe kudzikama kuko, unowotjengeta gumbo lilo kuti lisibhatshigwe.

²⁷Usibhatilile tjakanaka kuna banotjisheta, ha kuli mu simba lilo kukushinga.

²⁸Usidwe mbakidzani nawe uti, “Yenda, ubuye mangwana, ndowozha ndikupa” Koga iwe unatjo.

²⁹Usitongo lukila mbakisani nawe bubi iye ugele nawe e kugalabgwe

³⁰Usitongo gwisana ne nthu kusina tjaakutjinya.

³¹Usitongo yemula nthu we phipiti, kakale usitobele imwe ye zila dzidze

³²ngobe nthu mbiimbi unoshimisa kuna Yahwe koga nlulwami umu bhapilo lile.

³³Bhiso la Yahwe limu ng'umba ye batjinyi koga banokombolela bugalo gwe balulwami.

³⁴Banodadila badadi banolakidza ludo kuna banozwiyisa pasi.

³⁵Bakatjenjela banowothuwa thaka ye gudzo koga zwilengwe zowo bhakhwa nge shoni.