Read Kalanga Makungulupeswa 30 Bible Online

Makungulupeswa 30 - Kalanga bible

Makungulupeswa 30

¹Matama a Aguri nkololo wa Jake we Masa. Nthu unoti kuna Itiyeli, kuna Itiyeli ne kuna Ukali:

²Malebeswa wose ndi tjilengwesa kuti ndibe nthu. Andina hwisiso ye nthu.

³Andizozwidiya butjenjedu, naiko kuziba ngekwa iye Wakayengemala.

⁴Ndiyani wakatathila kudzimu kabuya ka delukila pasi? Ndiani wakafumbatila phepo mu mbaka dzidze? Ndiyani wakapetela vula nge tjiambalo? Ndiyani wakasika mbizho dzose dze shango? Zina lile ndiani, ne zina le nkololo uwe ndiani? Nge malebeswa unoziba!

⁵Dama limwe ne limwe le Ndzimu lakanatshiwa; ndiwo tjivikiso kuna banotizhila kuwuli.

⁶Usitongo paphidza matama awo, ungadwa ukakutjemela, udwa uwangwa uli nnyepi.

⁷Zwithu zwibili zwandinokumbila kumuli, musindilambile izo ndisathu afa,

⁸Dusilani kule nami zwisiyizo ne manyephwa, musindipe bushayi kene fumwa, mundigutshe ne zojiwa zwandinosheta,

⁹ndingadwa ndi guta, ndibe ndimuzwilandula, nditi, “Yahwe ndiyani?” Kene ndidwa ndibe nshayi ndibe ndikwiba, ndibe nditjinya zina le Ndzimu wangu.

¹⁰Usitongo nyeya nlanda kuna tetshi uwe, asidwe ekulonga bhiso, ubouwang'wa uli nlandu.

¹¹Kuna ibabo banolonga botate babo bhiso, basingakombolele bomme babo.

¹²Kuna ibabo babuya mu mesho abo, koga basakangudziwa shambgwa yabo.

¹³Kuna ibabo be mesho anozwikudza, anolingila pezhugwi!

¹⁴Kuna ibabo bana meno anopitsha be meno e mipanga, kuponda bashayi mu shango, bashayi kubadusa mu bathu.

¹⁵Munyopi tjina bakololokadzi babili; “Mundipe, mundipe,” banolila. Kuna zwithu zwitatu zwisingafe zwa gutshika, zwinna azwitotongoti, “Kwa lizana”:

¹⁶ikumbu, mbeleko isingazwale, shango inogala ina nyota ye vula, ne moto usingatongoti, “Kwa lizana.”

¹⁷Zhisho linodadila tate, linolingila kuhwa mme balo pasi lowokopogwa nge makungubo e nkuku likanojiwa nge magola.

¹⁸Zwithu zwitatu zwinonditjenamisa, zwinna anditozwihwisisa,

¹⁹zila ye dzu mu makole, zila ye nyoka mu shongwe, zila ye ikepe mu makungwa, ne zila ye nlume ne nsikana.

²⁰Ndiyo zila ye phombgwekadzi, unoja, ebe bukusha nlomo, ebuya eti, “Hakuna tja ndatjinya.”

²¹Zwithu zwitatu zwinozunguza shango, zwinna zwaisingatubule kumilana nazo,

²²nlanda ha ebe mambo, ne tjilengwe ha tjakaguta zojiwa,

²³nkadzi usingadiwe ha ewana nlume, ne nlandakadzi ha etolela tetshikadzi uwe nlume.

²⁴Zwithu zwinna mu shango zwitukununu, koga zwakatjenjela kwazo,

²⁵ntjenje ludzi gusakasima, ngono unozwikubunganyila zojiwa mu zhizha,

²⁶mbila ludzi gusakasima, ngono dzothama mizi yadzo mu shongwe,

²⁷phashu adzina mambo, ngono dzoyenda dzili nlunda,

²⁸tjibululu ungatjibhata ne luboko, koga tjogala mu ng'umba dza bomambo.

²⁹Zwithu zwitatu zwinotshamba tjimambo, zwinna zotshamba sa bomambo,

³⁰shumba, iyo yakasima kupinda zwibandana zose, akuna tjainotja,

³¹gukurume linotanyaila, phoko ye mbudzi, na mambo unotanyayila mbeli kwe bathu babe.

³²Ha wakabe uli tjilengwe, uzwikudza, kene wakabe uluka bubi, bhata nlomo uwo.

³³Ngoti nkaka ha unonubugwa unodusa mafuta, kutshamba tjimilo kodusa malopa, ne kushoka kugwadzamoyo ko zhisa kukwebakwebana.