Read Kalanga Makungulupeswa 31 Bible Online

Makungulupeswa 31 - Kalanga bible

Makungulupeswa 31

¹1 Matama a Mambo Lemuyeli, mambo we Masa aakadiyiwa na mmeyabe,

²Ndingatini wali nkololo wangu? Ndingatini, nkololo we mbeleko yangu? Nditini nkololo we phiko dzangu?

³Usipedzele masimba awo mu bakadzi, usipedzele zila dzidzo muna ibabo banokolomola bomambo.

⁴Akute kuli kwa bomambo Iwe Lemuyeli, akute kuli kwa bomambo kung'wa nkumbi we zhambi, kene babusi ku yemula kung'wa busukwa,

⁵ngobe pabangan'gwa bangadwa bakakangang'wa nlayo tjaunoleba, ne kupeyamisa fanilo dze banotshambilidziwa.

⁶Ipani busukwa nthu unofazwe, ne nkumbi we zhambi kuna bana buyendasi bukulu,

⁷ngabang'we kuti bakangang'we bushayi gwabo, ne kukangang'wa kudziyidzika kwabo.

⁸Lebelekela mbebebe na ibabo basina bangabalebelekela.

⁹Zhula nlomo uwo, usumikilise nge ndulamo, utjengete fanilo dze bashayi ne badziyili.

¹⁰Ndiyani ungawana nkadzi wakati piti kene? Ngekuti themba iye inopinda ye thakwala.

¹¹Moyo we nlume uwe unon'galabgwe kunokona, akuna tjaanosheta tje themba.

¹²Unoyitila nlume uwe zwakanaka, kusi zwakabipa, mu butjilo gugwe gose.

¹³Unoshaka wulu ne lutokwe, eshinga nge bunyambi nge maboko awe.

¹⁴Unofanana ne zwikepe zwe batengesi, unotola zojiwa kule.

¹⁵Unomuka kutji busikwana, e shakila be nsha uwe zojiwa ne kupa balandakadzi mishingo yabo.

¹⁶Unoshaka nnda kawutenga, nge maboko awe unolima nnda we mizhambi.

¹⁷Unosunga thunji dzidze nge masimba, kasimisa maboko awe.

¹⁸Unobona kuti kushaba kukwe kombuzila, luvone gugwe agutodzima busiku.

¹⁹Unobhata nge maboko awe tjinolukisa, nge maboko awe kabhata theswi dzatjo.

²⁰Una nzhazho ne bashayi ka tambunudzila luboko kuna banosheta.

²¹Aatotjila be nsha uwe kapuku, ngekuti bose be nsha uwe banofuka zwinodziya.

²²Unozwithamila tyali, ne zwimwe zwiambalo zwe mibala mibuya.

²³Nlume uwe unozibgwa ku lubazhe, ha aligele pakati kwe bahwola be ntuthu.

²⁴Unothama matyila e atengesa, unoyisa mimwandabula ku batengesi.

²⁵Simba ne gudzo ndizo zwiambalo zwizwe, unoseka ha ekumbula tjibaka tjinozha.

²⁶Unozhula nlomo uwe elebeleka nge butjenjedu, ne lulimi gugwe godiya buthu.

²⁷Uno tjengeta zwinoshingikala kuna be nsha uwe kakale aatoja zwe busimbe.

²⁸Bana babe banoma nge makumbo beti kunli, “makakombolegwa,” nlume uwe na iye unonkudza,

²⁹“Bakadzi banjinji bakathama zwakanaka, koga iwe unobakunda bose.”

³⁰Kunaka kotjengedza, ne bubuya mazakhwa, koga nkadzi unotja Yahwe ndiye unofanila kulumbidzwa.

³¹Mumpe mitjelo ye maboko awe, ne mishingo iye ngainlumbidze mu lubazhe.