Read Kalanga Makungulupeswa 4 Bible Online

Makungulupeswa 4 - Kalanga bible

Makungulupeswa 4

¹Imwi bakololo, ihwani kudiya kwa tate benyu, mu bhulutane, kuti mube ne hwisiso,

²ngobe ndomupa zwidiyo zwibuya musilashe zwidiyo zwangu.

³Ndakati ndili nkololo wa tate bangu, nditji ntjetjana, ndili ndoga mwana muna mme,

⁴tate bakandidiya beti kundili, “Moyo uwo ubhate matama angu londolodza milayo yangu, utjile.

⁵Usikangang'we, kakale usifupatile matama e nlomo wangu. Wana butjenjedu, uwane hwisiso.

⁶Usitongolasha butjenjedu, gowokutjengeta ugude gowokulinda.

⁷Kutangisa kwe butjenjedu ndi woku, wana butjenjedu na kose kwaunga wana, uwane hwisiso.

⁸Ugukudze, gowokumilidzila pezhugwi gowokukudza ha unga gugumbatila.

⁹Gowokubigila tjiala tjakanaka mu nsholo uwo guka kuambadza tjiala tje bubuya.”

¹⁰Undihwe nkololo wangu, ngono uamutjile matama angu kuti makole e butjilo gugo abe manjinji.

¹¹Ndakudiya zila ye butjenjedu ndakutungamilila mu zila dzakatambunuka.

¹²Ha uyenda, thambo dzidzo akuna tjingadzipinganyidza kakale ha ulabuka, autowokuthiwa ne tjimwe.

¹³Ubhate ndayo yangu, usitongoilasha uitjengete, ndigo butjilo gugo.

¹⁴Usingine mu zila ye babi usiyende muzila ye bakabipa.

¹⁵Usibe ne hanya nayo, usiitobele, uileye uyende kwaunoyenda.

¹⁶Ngobe abangayizele basathama tjimwe tjakabipa; abangadzibone hwope kusina wabatjinyila.

¹⁷Banoja zojiwa zwe mbipo be ng'wa nkumbi we phipiti.

¹⁸Zila ye bakalulwama inonga tjedza tje mazhokuyedza tjinopaphidzika kuswikila masikati makulu.

¹⁹Zila ye bathu babi inonga zhalima lakatizwititi, abatoziba tjingabakutha muili.

²⁰Nkololo wangu, bhulutana matama angu, teya zebe muna zwandinoleba.

²¹Asitongodwa mu mesho awo, uabhate nge moyo uwo.

²²Ngobe ndigo butjilo muna unoawana, i bhodzo mu mbili uwe.

²³Tjengeta moyo uwo nge butjenjedu, ngobe kudwa muuli kowunga hwoba dze butjilo.

²⁴Dusa ndebo dzakaleyana mukuli uduse ndebo dzakabipa mu nlomo uwo.

²⁵Mesho awo ngaalinge mbeli, mesho awo alinge kwaunoyenda.

²⁶Yelanjele zila yaunotshamba muili, ngono zila dzidzo dzose dzowotambunuka.

²⁷Usitongo pambukila kuluji kene ku lumeshwe, tshedusa gumbo lilo muna zwakabipa.