Read Kalanga Makungulupeswa 5 Bible Online

Makungulupeswa 5 - Kalanga bible

Makungulupeswa 5

¹Nkololo wangu, bhulutana butjenjedu gwangu, Teya zebe uhwe kuhwisisa kwangu,

²kutindizo ugale una njele, ne milomo iyo itjengete luzibo.

³Ngobe milomo ye nkadzi we bamba inodotha butji, ne ndebo iye inosodzoloka kupinda mafuta,

⁴koga mu bupelo unobaba se nshashanyama, unopitsha se thumo linotjeka ntha dzose.

⁵Makumbo awe anoyenda ku lufu, thambo dzidze dzotobela zila inoyenda ku gomba,

⁶aana hanya ne zila inoyenda ku butjilo, zila dzidze dzakamoneleka koga ngono aatoziba nge kwako.

⁷Koga ngwenu, imwi bakololo, munditeedze, kakale musithubukane ne matama e nlomo wangu.

⁸Muzanile kule kwe nkadzi wakajalo, kakale musitongo yenda pejo ne nkoba we ng'umba iye,

⁹kuti musidwe mupa bamwe gudzo lenyu, ne makole enyu kuna bana mimoyo mikukutu,

¹⁰kuti musidwe motolegwa masimba ne bataya ne fumwa yenyu ingadwa ikanojiwa ne bapoga,

¹¹kukoti mu bupelo gwe butjilo nthu ekogomela, nyama ne mbili zwashakala,

¹²ekoti, “Ndakabe ndakabenga kulayiwa tjini, ne moyo wangu wakalingila pasi kutjemegwa!

¹³Andizo teedza hwi le badiyi bangu, kene kuteya zebe yangu ku balayi bangu.

¹⁴Ndakabe ndabepejo ne kuloba, pakati kwe gubungano.”

¹⁵Ing'wa vula mu tshime lilo, vula inodwilila mu tshime lilo woga.

¹⁶Apa misenya iyo ingawungila pamwe ne pamwe, misenya ye vula mu dzizila kene?

¹⁷Ngaibe misenya inong'wiwa nawe koga, usinga ishanganyila ne bataya.

¹⁸Tshime lilo ngali kombolegwe, kakale ushathile nkadzi we buzhuzha gugo,

¹⁹se phala hadzi yakanaka ne ngululu hadzi mbuya. Mazhamu awe ngaakugutshe nge shatho, ugale wakagutshiwa ne ludo gugwe.

²⁰Nkololo wangu, ini ungatogwa mazwiwo ne bamba wali ube ushathisiwa nge kun'gumbatila?

²¹Ngobe zila dze nthu dzimu mesho a Yahwe, ibo banobona zila dzidze dzose.

²²Jinyo le nthu lombhatshila, kakale unobhatshigwa mu mishingo iye ye bubi.

²³Unobulawa nge kushaya kutjemegwa, ngekwe bulengwe gugwe bukulu wakalashika.