Read Kalanga Makungulupeswa 6 Bible Online

Makungulupeswa 6 - Kalanga bible

Makungulupeswa 6

¹Nkololo wangu, ha wakazwisunga kuti unowolipa ikoloto tje mbakidzani uwo, wakagadzabgwe kubhatsha ntaya,

²ha wabhatshigwa nge matama awaleba, wabhakhwa mu matama e nlomo uwo,

³tjithama woku, nkololo wangu kuti uzwitjidze ngobe wabe mu simba le mbakidzani uwo, tjimbidza unkumbile akusunungule.

⁴Usitongo izelela ndebo iyeyi usitshung'ayile ne kutukununu kose,

⁵uzwitjidze se phala itizha mvimi, se nyuni ipudzumuka mu luboko gwe nteyi.

⁶Yenda ku jenetha simbe ndiwe ubone sekwa linoshinga, u tjenjele.

⁷Alina ntungamili kene nlingili kene mbusi,

⁸lolulwamisa zojiwa zwalo mu zhizha likubunganya zojiwa zwalo mu tjibaka tje kuvuna.

⁹Unowolala ipapo kuswikila lini, simbe ndiwe? Unowomuka mu hwope dzidzo lini kene?

¹⁰Kuyizela kushomanana, kutshung'ayila kushomanana kufukata maboko nthu eti unonyaluluka,

¹¹saikoko bushayi gowozha se mbava, kusheta kukuwila se nthu wakadedela zwibhayano.

¹²Nthu usina nshingo, nthu mbiimbi, unoyenda eleba ndebo dzisakatambunuka,

¹³eti volivoli mesho, etendeka ne makumbo ne tjinyala tjitje,

¹⁴ne moyo usakalulwama unoluka zwakayipa, etombelela edzwala sahwanana,

¹⁵ndizo wali unotjimbidza ngina mu mbatsha, mu tjibakanyana unowogwala gusina ndapo.

¹⁶Kuna zwithu zwitathatu zwinobengiwa ndi Yahwe, zwili kutendeka zwabanoshima,

¹⁷mesho ana mazwikudzo, lulimi gunonyepa, ne maboko anotebula lopa lisina nlandu,

¹⁸moyo unoluka mano mabiibi, makumbo anolabuka elibilidzila kunotjinya

¹⁹ne nyepi unopa butendeki gwe manyepkhwa ne nthu unogwisanya bana be nthu.

²⁰Nkololo wangu, londolodza nlayo wa tate babo, kakale usilashe zwidiyo zwa mme babo.

²¹Zwigale mu moyo uwo mu zwibaka zose, uzwisungile mu ntshibha uwo.

²²Ha uyenda zowokutungamila, ha uizela zowokulinda, kakale ha umuka zowolebeleka nawe.

²³Ngobe nlayo luvone kakale zwidiyo i tjedza, ne kutjemegwa mu butjilo nlenje we butjilo,

²⁴kukubakilila mu nkadzi mbiimbi, ungakutjebela nge lulimi gwe bubamba.

²⁵Usitongo yemula bubuya gugwe, usi nletje akakuweba nge mesho awe,

²⁶ngobe fukula inotengwa nge tjiwunga koga phombgwekadzi inolonga bushayi butjilo gwe nlume.

²⁷Apa nthu ungasenga moto ne hapkhwa, ukasi mpisile zwiambalo kene?

²⁸Kene nthu ungayenda mu masimbe anopisa makumbo awe akasitshwe kene?

²⁹Kwakajalo koga ne nthu unowalilana ne nkadzi we mbakidzani uwe, akuna unonbhata ungasalobgwa shamu.

³⁰Apa bathu abatolingila pasi mbava inokwiba kuzwigutsha ha ina zhala kene?

³¹Koga ha ibhakhwa, inowolipa katendeka, inowolipa nge thundu yose yainayo.

³²Iye unothama bupombgwe aana njalakang'wa, iye unothama ikoko unozwibulaya.

³³Mbonje ne shoni ndizo zwaanowowana ne kulengudzika kukwe akutowofa kwapela.

³⁴Ndandala inothama kuti nlume abe ne bushongola kakale aatowoshalula ha ebgwilizila.

³⁵Aatowoamutjila ndipo kene kushathisiwa nge zwipo zwinjinji.