Read Kalanga Makungulupeswa 7 Bible Online

Makungulupeswa 7 - Kalanga bible

Makungulupeswa 7

¹Nkololo wangu, londolodza matama angu, kakale utjengete milayo yangu,

²londolodza milayo yangu utjile ubhate zwidiyo zwangu ne ludo gugo gose,

³uzwisungilile mu zwinyala zwizo, uzwikwale mu moyo uwo.

⁴Uti ku butjenjedu, “U hazwadzi yangu,” udane hwisiso nzwalani wepa moyo,

⁵kuti ubakililike mu bamba, fukula inoleba matama anosodzoloka.

⁶Ngoti ndakashozhela nge fesitere le ng'umba yangu,

⁷ngono ndakabona pakati kwe basakatjenjela, abona we tjilengwe pakati kwe bazhuzha,

⁸e nyenyeledza ali mu zila epinda pa ndzibo uwe etola zila inoyenda ku ng'umba ye fukula

⁹kuli madekwana kwatjibhata, mu zhalima le busiku.

¹⁰Ipapo tjinyolotjo nkadzi kanshanganidza, akaambala se fukula, wakatjenjelela ntome.

¹¹Nkadzi iwoyu unolebanya, unotjutjula aatogala pasi,

¹²unobe mu dzizila kabe mu matengeselo, unolalila mu ndzibo mmwe ne mwe.

¹³Unontshakatila e mputa, unolebeleka akasima moyo eti kunli,

¹⁴“Ndakadusa tjipo tje mbakisano ngono nasi ndalipa zwandakagadzabwe,

¹⁵ndizo ngwenu ndazha kukushanganidza, ndakushaka ngono ndakuwana.

¹⁶Ndawala bulawo gwangu ne matyila mabuya, ana mibala yakanaka e jila le Egipiti,

¹⁷ndafafayidza bulawo gwangu nge mafuta anonuhwilila, e mira, gonde ne sinamoni.

¹⁸Buya, tishathisane nge ludo kuswikila mangwanana, ngatizwishathise nge ludo.

¹⁹Ngobe nlume wangu aapo mu nzi, wakatola gwendo bulefu,

²⁰wakayenda ne hwomo ye mari, unowobuya tjose mwedzi uli ntjena”

²¹Nge ndebo iye yakanaka unonkwekweredza, ne matama awe anosodzoloka wakambhata.

²²Tjinyolotjo nzhuzha unonsala shule, se ng'ombe ikwebegwa kunobulawa, kene se phuka yabhatshigwa,

²³kuswikila thumo liipubula mabula, se nyuni iwila mu dati, aatoziba kuti unowolipa ne butjilo gugwe.

²⁴Ndizo ngwenu, imwi bakololo, mundibhulutane, kakale muteedze kwazo matama e nlomo wangu.

²⁵Musi letje mimoyo yenyu ikapambukila ku zila dzidze, musitongo lashikila mu zijana dzidze,

²⁶ngobe banjinji baakaliga, baakabulaya abana mbalo.

²⁷Ng'umba iye i zila inoyenda ka Satani, idelukila ku ng'umba dze lufu.