Read Kalanga Makungulupeswa 8 Bible Online

Makungulupeswa 8 - Kalanga bible

Makungulupeswa 8

¹Apa butjenjedu aguto danilila wali, apa kuhwisisa akutomilidza hwi lako kene?

²Mu matuthu hwunde ne zila, mu zijana kotola mamo ako,

³kubapa ne mikoba inongina mu nzi nkulu, panongingwa ndipo kodanilila kuti,

⁴“Ku muli, imwi balume, ndodanilila, ngono kudanilila kwangu kwakalingisana ne bakololo be bathu.

⁵Imwi basakatjenjela, muzwidiye butjenjedu, imwi zwilengwe, teedzani.

⁶Ihwani, ngoti ndowoleba zwina mongo, mu milomo yangu kowobhuda zwakatambunuka,

⁷ngobe nlomo wangu unowoleba lebeswa, ngobe ndo shema manyepkhwa.

⁸Matama wose anodwa mu nlomo wangu akalulwama, akuna tjimwe tjakakombama kene tjakapeyama muali.

⁹Akatambunuka wose kuna unohwisisa, kakale akalulwamila kuna banowana luzibo.

¹⁰Amutjila kulaya kwangu pana kushaka siliva, ne luzibo pana kushalula golide,

¹¹ngobe butjenjedu gopinda maseka, ngono kose kwaungayemula kube nako akungafanidzanyiwe nago,

¹²imi, butjenjedu, ndogala ne hwisiso, kakale ndowana luzibo ne nkumbulo wakalulwama.

¹³Kutja Yahwe hwubenga mbipo. Ndoshima mazwikudzo ne kuzwida ne zila yakabipa ne ndebo dzakaleleka.

¹⁴Ndina mano ne butjenjedu gwakati piti, ndina hwisiso, ndina matatabuko.

¹⁵Bomambo ba buse ndimi, ne babusi banothama milayo yakatambununuka,

¹⁶ne bakololo ba bomambo banobusa ndimi, ne makombgwa banobusa shango.

¹⁷Ndoda ibabo banondida, ne banondishaka kwe malebeswa banondiwana.

¹⁸Fumwa ne gudzo zwinami, fumwa isingapele ne dwililombeli.

¹⁹Ntjelo wangu unopinda golide yakakuyungiwa, ne zwizwalo zwangu zo pinda siliva.

²⁰Ndoyenda yenda mu zila ye ndulamo, mu zila dze kutambunuka,

²¹ndikobela fumwa ibabo banondida, kuti bazhadze matula abo.

²²Yahwe bakandisika mu kutangisa kwe nshingo wabo, ndili mbano ye mishingo yabo ya ntolo.

²³Ndaka bigwa ntolo ntolo, kutanga kusathu kukasikwa shango.

²⁴Ndakazwagwa kusathu kukabe ne makungwa, kusathu kukabe ne misenya inoma vula.

²⁵Ndakazha kusathu kukasikwa matombo ndakabe po matuthu asathu kasikwa,

²⁶basathu bakasika shango ne mituthu yayo, kene naiyo hwuluba ye kutanga ye shango.

²⁷Bakati besika kudzimu, ndakabe ndilipo, ha bethama makungwa,

²⁸pa baka simisa zhuzhugwi, pa bakabakilila makungwa,

²⁹pa bakabigila gungwa n'gathu kuti vula isitongo pindilila, pa bakatala thiwa dze shango,

³⁰ipapo ndakabe ndinabo, ndili phizha, ndibashathisa zhuba ne zhuba, ndipembela mbeli kwabo misi yose,

³¹ndipembela mu shango yabo, kakale ndishathila bakololo be bathu.

³²Ndizo, bakololo bangu, mu ndi teedze: bakakombolegwa banolondolodza zila dzangu.

³³Ihwani ndayo dzangu mu tjenjele, musitongo dzilashilila.

³⁴Wakakombolegwa nthu unondihwilila, akalinda mazhuba wose pa mikoba yangu, akalinda pawunde ye mikoba yangu.

³⁵Ngobe iye wandiwana unowana butjilo, ngono unowana ludo muna Yahwe,

³⁶koga iye usingandiwane unozwikubadza; bose banondibenga banoda lufu.”