Read Kalanga Makungulupeswa 9 Bible Online

Makungulupeswa 9 - Kalanga bible

Makungulupeswa 9

¹Butjenjedu gwakabaka ng'umba yago, gwakaibamba ne phanda dzili kutendeka.

²Gwakabhaya ng'ombe dzago, gukashanganya nkumbi wago we zhambi, ne tafuli ye zojiwa yakalulwamisiwa.

³Gwatuma balandakadzi kunokoka bathu mu magalo apezhugwi mu nzi nkulu guti,

⁴“Usakatjenjela, ngaanginile ngeno.” Kuna basina nkumbulo goti,

⁵“Buyani muje tjiwunga tjangu, mung'we nkumbi we zhambi wandakashanganya.

⁶Letjedzani bulengwe, mutjile, muyende mu zila ye hwisiso.”

⁷Iye unotjemela ndadi unozwidanila kutukwa, iye unotambunudza nthu mbimbi unowokubala.

⁸Usitongo tjemela ndadi, ngobe unowokubenga, tjemela ntjenjedu ngono unowokuda.

⁹Laya ntjenjedu, ngono iye unowotjenjelela mbeli, diya nthu wakalulwama unowopaphidzika mu luzibo.

¹⁰Kutja Yahwe ndiko kutangisa kwe butjenjedu, ne kuziba Wakayengemala ndiyo hwisiso.

¹¹Ngoti nge kwangu mazhuba awo anowowatshika, makole anowopaphidziwa mu butjilo gugo.

¹²Ha wakatjenjela, wakazwitjenjelegwa, ha udada, unowodziyila woga.

¹³Nkadzi we tjilengwe una zhoba, ha ana mano kakale ha ana shoni.

¹⁴Unogala pa nkoba we ng'umba iye, unogala mu tjigalo tjipezhugwi mu nzi nkulu,

¹⁵edana ibabo banopinda, banoyenda mu zila dzabo eti,

¹⁶“Iye usakatjenjela, ngaanginile ngeno!” Kuna usina hwisiso unoti kunli,

¹⁷“Vula yakwibiwa inozipa, ne tjiwunga tjinojigwa mu ikohwa tjozipa.”

¹⁸Koga aatoziba kuti bafi bayapo, kuti bezi be nkadzi uwoyo ba mukatikati kwe ikumbu.