Read Kalanga Nsumikili 1 Bible Online

Nsumikili 1 - Kalanga bible

Nsumikili 1

¹Awa matama e Nsumikili, nkololo wa Dafite wakabe ali mambo mu Jerusalema,

²“Madatha e madatha,” koleba Nsumikili. “Madatha e madatha! Tjimwe ne tjimwe madatha.”

³Nthu unobuyigwa ngeni mukushinga kukwe, etukutila zwingapa mu shango?

⁴Tjizekugwana tjimwe tjopinda, tjizekugwana tjimwe tjozha, koga shango inogalila tjatjose.

⁵Zhuba lobhuda kakale zhuba longina, likatjimbidza labgwilila kwalinobhuda.

⁶Phepo inohwuhwudzila ku burwa, ikapotelekela ku bunandzwa, phepo ino poteleka ika tendeleka, ikabgwilila kwainodwa.

⁷Njizi dzose dzowungila ku gungwa, koga gungwa alitozhala, njizi kwadzinowungila, ikoko dzobgwilila kakale.

⁸Zwithu zose zwizhele manyalo, nge zila isina ungatjenesa, zhisho alitogutshiwa ngobona, na iyo zebe aitozhala ngohwa.

⁹Tjagalatjilipo nditjo tjinowobepo, ne tjakatongo shingwa, nditjo tjinowoshingwa, akuna tjithu tjitshwa mu shango.

¹⁰Akuna tjithu tjingayi nge kwatjo, “Bona, itjetji tjitshwa?” Tjakatongobepo kale, mu makole tisathu tikabepo.

¹¹Akuna ikumbuludzo tje zwakatongo bepo, kene akutobepo kualakana zwithu zwitjowoshingikala, muna batjowozha shule kwa ngwenu.

¹²Imi Nsumikili ndakabe mambo we Iziraela mu Jerusalema.

¹³Ndakashingisa nkumbulo wangu kushaka ne kufunyungudza ne butjenjedu, tjimwe ne tjimwe tjinoshingikala mu shango, Ndzimu wakapa bakololo be bathu ntolo kuti badzulane nawo.

¹⁴Ndakabona tjimwe ne tjimwe tjinoshingikala mu shango, koga bonani, tjimwe ne tjimwe madatha ekutatana ne phepo.

¹⁵Tjakakombama atjingatambunudziwe ne tjisipo atjingabagwe.

¹⁶Ndakazwidwa ndikati, “Ndakawana butjenjedu bukulu, kupinda bose bakatongo tungamila Jerusalema kunditangila, kakale nkumbulo wangu wakabe ne kuzhala butjenjedu ne luzibo.”

¹⁷Kakale ndakashingisa nkumbulo wangu kuziba butjenjedu ne bupengo ne bulengwe. Ndakabona kuti kose ikoku naiko hwutatana ne phepo koga.

¹⁸Mu butjenjedu kuzhele kudziyidzika, kakale iye unopaphidza luzibo unopaphidza buyendasi.