Read Kalanga Nsumikili 10 Bible Online

Nsumikili 10 - Kalanga bible

Nsumikili 10

¹Thuzi dzakafa dzonuhwisa zwizholo zwakabipa, saikoko bulengwe butukununu gokulila butjenjedu ne gudzo.

²Moyo we ntjenjedu unolinga zwakalulwama, koga we tjilengwe unolinga zwakabipa.

³Nenguba tjilengwe tjiyenda mu zila, atjina mano, koga tjoyenda tjilakidza mmwe ne mmwe kuti tjilengwe.

⁴Ha mbusi ekugwadzila moyo, usibhude pa uyapo, ngoti kugadzikana kozwimba milandu mikulu.

⁵Kuna bubi gwandakabona mu shango, godwa pa kuleyanya kwe babusi,

⁶bulengwe gowanika mu mamo manjinji a pezhugwi, koga bafumi bali mu mamo a pasi.

⁷Ndakabona balanda bakatatha mbizi, ne makulukota betshamba ne gumbo se balanda.

⁸Iye unotsha gomba unowowila mu lili, ne nyoka inowoluma iye unowothuka guma.

⁹Iye uno pkhwanya mabgwe unowokubadziwa ndiwo, naiye unophapha hwuni unowokubadziwa ne mbatsha dze hwuni.

¹⁰Shathu ha lakapuma, ngono nthu asakalikuswa, wakafanila kushingisa masimba, koga butjenjedu gobhatsha nthu kubhudilila.

¹¹Ha nyoka ingaluma isathu ikalapiwa, nlapi haatjina nshingo.

¹²Matama e nlomo we ntjenjedu anompa gudzo, koga milomo ye tjilengwe inotjibulaya.

¹³Tjotanga ne kuleba bulengwe tjikanopedza tjileba bubi gwe bupengo.

¹⁴Tjilengwe tjobalabala, akuna unoziba kuti mangwana kowobeni, hakuna ungaleba kuti kowoshingikalani shule kwatjo.

¹⁵Kushinga kwe tjilengwe kotjinyadza kwatjinopelela tjisingatjazibe zila inoyenda ku nzi nkulu.

¹⁶Yee mme wee! Mapalala imwi shango ha mambo wenyu ali itojana, ne makulukota enyu ana nzano mangwanana.

¹⁷Wakakombolegwa iwe shango, ha mambo uwo akazwagwa mu nsha we bushe, ne makulukota enyu ebe ne nzano mu tjibaka tjakalingisana, kuti ba sime, kusikuti balaladze.

¹⁸Nge busimbe denga le ng'umba lowila, ne kusazwibhatila ne maboko ng'umba ino na.

¹⁹Nzano wakathamigwa kushatha, ne nkumbi we zhambi wakathamigwa zipisa butjilo, ne mari i dabilo ye tjimwe ne tjimwe.

²⁰Ne mu nkumbulo uwo, usitongolonga mambo bhiso, kene uli mu ng'umbana iyo ye bulalo usilonge bafumi bhiso, ngobe nyuni ye phepo inga senga hwi lilo, kene tjimwe tjina mapapilo tjingasenga matama awo.