Read Kalanga Nsumikili 11 Bible Online

Nsumikili 11 - Kalanga bible

Nsumikili 11

¹Posela zojiwa zwizo mu vula, ngobe unowozwiwana shule kwe mazhuba.

²Kobela bali kutendeka, kene bali zhanakadzi dumbu, ngobe autoziba bubi gunga shingikala mu shango.

³Ha makole ali zhele vula, anoitebulila mu shango, ne nti ha ungawila ku burwa kene bunandzwa, pa unowila unolala ipapo.

⁴Iye unogala akalingilila phepo sekwa inothama aatodzwala, ne unoziba makole e vula sekwa anothama aangavune.

⁵Se usingazibe kuti meya inozha tjini ku mafupa a muntumbu we nkadzi wakazwisenga, ndizo autoziba mishingo ye Ndzimu wakabumba zwithu zose.

⁶Dzwala mbewu iyo mangwanana ne madekwana usiletje shinga, ngobe autoziba kuti inowokula ndiyipi eyi kene eya kene dzose dzowomela.

⁷Tjedza tjakanaka, kwakanaka ku mesho kulinga zhuba.

⁸Iko ha nthu etjila kwe makole manjinji, ngaashathe tjibaka tjose itjetjo, koga azibe kuti mazhuba e zhalima anowobe manji. Kose kunozha madatha.

⁹Pembela iwe nzhuzha mu buzhuzha gugo, uletje moyo uwo ukushathise mu mazhuba e butjetjana gugo, tobela zila ye tjinoda moyo uwo ne zwinobong'wa ne mesho awo. Koga ziba kuti mu zwithu zose izwezwi Ndzimu unowokusumikilisa.

¹⁰Dusa kudziyidzika mu nkumbulo uwo, usundile kutjena zogwadza kudwa pa mbili uwo, ngobe butjetjana ne buzhuzha madatha.