Read Kalanga Nsumikili 2 Bible Online

Nsumikili 2 - Kalanga bible

Nsumikili 2

¹Ndakazwidwa ndikati, “Izha ngwenu, ndowogwisa kuzwishathisa ndikapembela.” Koga bonani, naikobo madatha.

²Ndakati ngekwe tjiseko, “Bupengo,” ngekwe shatho, “Bhatsho yayo ini wali?”

³Ndakatongo zwibhuzwa mu nkumbulo kuti kene ndinga shathisa mbili wangu nge nkumbi we zhambi; nkumbulo wangu utjandilakidza nge butjenjedu kuziba bulengwe, kuswikilila ndingabona tjakalulwamila kushingwa nge bakololo be bathu mu shango mu mazhuba mashomanana e butjilo gwabo.

⁴Ndakashinga mishingo mikulu; ndakabaka ng'umba azwilimila minda ye mizhambi,

⁵ndakazwithamila minda ne pulazi, ngono ndakadzwala mitjelo yakasiyanasiyana muili.

⁶Ndakazwitshila matshime kuti ndidilidzile miti yandakadzwala.

⁷Ndakatenga balandalume ne balandakadzi ne bamwe balanda bakazwaligwa mu nzi wangu, ndakabe ne fumwa njinji ye ng'ombe ne pkhwizi ne mbudzi, kupinda bose bakatongobepo mbeli kwangu mu Jerusalema.

⁸Ndakazwikubunganyila siliva ne golide ne fumwa ya bomambo nenge mituthu, ndakazwishakila bambi be tjilume ne be tjikadzi ne zwamba zwinjinji, kuli shatho ye nthu tjilume.

⁹Ndizo wali ndakabe nkulu kwazo kupinda bose bakazha kunditangila mu Jerusalema ne butjenjedu gwakabaka mundili.

¹⁰Zose zwakabe zwiyemugwa nge mesho angu andizo anyima izo, andizodzibila moyo wangu mizipo, moyo wangu wakawana lushatho mu kushinga kwangu kose, ikoko kwakabe iwo mbhayilo wangu we kushinga kose.

¹¹Ipapo ndakati ndilinga zose zwakashingwa nge maboko angu ne dukuta landakatebula mu kushinga zwithu izwezo, bona, kose kwakabe madatha ne tatana ne phepo, akuna nthu tjaangabhula mu shango.

¹²Ndizo ipapo ashanduka alingisisa butjenjedu ne bupengo ne bulengwe, ngoti nthu unozha shule kwa mambo ungathamani wali kuzhe kwe tjakathamiwa kale.

¹³Ndipo pandakabona kuti butjenjedu gopinda bulengwe se tjedza tjipinda zhalima.

¹⁴Ntjenjedu una mesho mu nsholo uwe koga tjilengwe tjoyenda mu zhalima. Ngono ndakabona kuti bhelelo labo lofanana.

¹⁵Ipapo ndakazwidwa nditi, “Tjinowila tjilengwe tjowondiwilabo, ini ndakabe ne butjenjedu gungapa wali?” Ndakazwidwa nditi naikobo madatha koga.

¹⁶Ngoti ntjenjedu koga se tjilengwe unokanganika, se tibona kuti mu mazhuba anozha bose banowobe bakanganika ntolo. Koga se tjilengwe ntjenjedu unofa bo!

¹⁷Ndizo abenga butjilo ngoti zose zwinoshingwa mu shango zwakandihwisa zogwadza, ngoti kose madatha ne tatana ne phepo.

¹⁸Ndakabenga kushinga kwangu kwandakashinga mu shango, ha ndibona kuti ndakafanila siyila unowozha shule kwangu mu shango,

¹⁹kakale ndiyani unoziba kuti unowobe ali ntjenjedu kene tjilengwe? Nenguba ewobe mweni wa zose zwa ndakashingila ndishingisa butjenjedu gwangu mu shango. Naiko ikoku bo madatha.

²⁰Ndizo wali ndakanyala moyo atemeka mafupa ngekwe nshingo wangu wose wandakashinga mu shango.

²¹Ngoti nthu ungashinga nge butjenjedu nge luzibo nenge bunyambi kudwapo kasiya fumwa yose kujiwa nge nthu usaka ishingila. Naikoko bo madatha ne mbipo yakabangalala.

²²Hwuti nthu unobuyigwa ngeni mu kutukutila eshinga ezikitila mu shango?

²³Nekuti mazhuba awe wose azhele zogwadza, ne nshingo uwe uzhele buyendasi, ne kuli busiku nkumbulo uwe autonyaluluka. Ikoku naiko bo madatha.

²⁴Akuna tjimwe tjibuya tje nthu kuzhe kwe kuti aje ang'we, kakale awane kushatha mu kushinga kukwe. Ikoku naiko bo, ndakabona, kodwa mu luboko gwe Ndzimu,

²⁵nekuti hakwabe kusi iwo, ndiyani ungaja kene akabe ne kushatha?

²⁶Nthu unoshathisa Ndzimu, unopiwa butjenjedu ne luzibo ne kushatha, koga ku ntjinyi Ndzimu unompa kukubunganya ne kubutitika, ngono kapelela apa iye unoshathisa Ndzimu. Ikoko bo madatha ne tatana ne phepo.