Read Kalanga Nsumikili 3 Bible Online

Nsumikili 3 - Kalanga bible

Nsumikili 3

¹Tjimwe ne tjimwe tjina nsi watjo, ne ndebo imwe ne imwe ina tjibaka tjayo mu shango:

²Kuna tjibaka tje kuzwagwa ne tjibaka tje kufa, tjibaka tje kudzwala ne tjibaka tje kuvuna,

³tjibaka tje kubulaya ne tjibaka tje kupodza, tjibaka tje ku pkhwanya ne tjibaka tje kubaka,

⁴tjibaka tje kulila ne tjibaka tje kuseka, tjibaka tje kudzipitana ne tjibaka tje kuzana,

⁵tjibaka tje kulasha mabgwe ne tjibaka tje kukubunganya mabgwe, tjibaka tje kugumbatila ne tjibaka tje kusagumbatila,

⁶tjibaka tje kushaka ne tjibaka tje kulashikigwa, tjibaka tje kubiga ne tjibaka tjekulasha,

⁷tjibaka tje kupalula ne tjibaka tje kuthuma, tjibaka tje kunyalala ne tjibaka tje kulebeleka,

⁸tjibaka tje kuda ne tjibaka tje kubenga, tjibaka tje ngwa ne tjibaka tje mbakiso.

⁹Nshingi unobuyigwa ngeni mu kushinga kungapa?

¹⁰Ndakabona ntolo wakapiwa bakololo be bathu nge Ndzimu, kuti badzulukutane nawo.

¹¹Wakathama tjimwe ne tjimwe kuti tjinake mu tjibaka tjatjo, kakale wakalonga kusina bupelo mu nkumbulo we nthu, kuti asitongobe ne unoziba Ndzimu tjawakathama kudwa kutangisa kunoti ku bupelo.

¹²Ndoziba kuti akuna tjimwe tjinoyita mubali kuzhe kwe kushatha ne kupembela ha batjatjila mu shango,

¹³kakale kuti itjipo tje Ndzimu ku bathu kuti mmwe ne mmwe aje ang'we kakale awane kushatha mu nshingo uwe.

¹⁴Ndoziba kuti tjinobe tjathamiwa nge Ndzimu tjogalila tjose, akuna tjingapaphidziwa mutjili, kene tjimwe tjinga dusiwa mutjili, Ndzimu wakathama kuti kujalo, kuti ndizo bathu bautje.

¹⁵Itjo tjiyapo, tjakabepo kale, tjinowobepo, tjakabepo kale, kakale Ndzimu unoshaka itjetji tjakapinda kale.

¹⁶Pezhugwi kwa ipapo ndakabona kuti mu shango mu bumo gwe thambunuko kuna bubi ne mu bumo gwe ndulamo naipo bo pana bubi.

¹⁷Ndakati mu moyo, “Ndzimu unowosumikilisa balulwami ne batjinyi,” nekuti wakabiga tjibaka tje ndebo imwe ne imwe, ne tjibaka tje nshingo mmwe ne mmwe.

¹⁸Ndakazwidwa mu moyo wangu ngekwe bakololo be bathu kuti Ndzimu unobalika kubalakidza kuti ba phuka.

¹⁹Zwinoshingikalila bakololo be bathu ne zwinoshingikalila phuka zofanana, nthu ha efa phuka inofabo. Zose zofema, kakale nthu aana tjaanopinda phuka nditjo, nekuti kose madatha.

²⁰Zose zoyenda pathu pa ng'ompela, zose zodwa mu mavu, kakale zose zowobgwilila ku mavu.

²¹Ndiyani unoziba kuti meya ye nthu ini yenda kudzimu meya ye phuka iyo inoyenda pasi mu shango kene?

²²Ndizowali ndakabona kuti akuna tjinopinda kuti nthu azipigwe ne nshingo uwe, ngobe ndilo gobe lile, ndiyani utjowommusa kuti azhe kuwobona zwinoshingikala asinobe afa?