Read Kalanga Nsumikili 4 Bible Online

Nsumikili 4 - Kalanga bible

Nsumikili 4

¹Kakale ndakabona kutshambilidziwa kose kunoshingikala mu shango. Tjidzobona, mishodzi ye banotshambilidziwa, ngono akuna unobanyaladza! Ku lubizho gwe batshambilidzi babo kwakabe kuna simba, ngono kwakabe kusina unobanyaladza.

²Ndakaalakana zwangu kuti bathu bakafazwabo kale banoyita pana banotjila,

³koga unobapinda bose ndeusathu akabepo, kakale aathu akabona mishingo mibiibi inoshingikala mu shango.

⁴Ipapo ndakabona kuti kukakanyala ne kushinga ne bunyambi zodwa mu kuyemula zwe mbakidzani naye. Ikoku naiko madatha ne tatana ne phepo.

⁵Tjilengwe tjofukata maboko atjo, tjikazwija nyama.

⁶Koyita kutukununu kunozhala luboko ngono una mbakiso, pana kunozhala maboko mabili ngono azhele kushinga ne kutatana ne phepo.

⁷Kakale, ndakabona madatha mu shango,

⁸nthu usina uwe, kene mwana we tjilume kene nnung'una, koga egala eshinga koga ne mesho awe aatoguta fumwa, kwaasingake akabhuzwa kuti, “Iko ndodziyilila ani zwingapa ndizwinyima nzipo?” Ikokubo madatha ne nja usingashathise.

⁹Bathu babili banopinda nng'ompela, ngobe bana mbhayilo mbuya we nshingo wabo.

¹⁰Ngobe ha bewila pasi, mmwe unomusa nkwinya, yee mme wee wapalala iye uyega unoti ewila pasi akashaya unommusa.

¹¹Kakale, ha babili beyizela bose, banodziyigwa, koga nthu ungadziyigwa tjini aliyega?

¹²Nthu unotubula kunda mmwe unobe aliyega, koga babili aangamililane nabo. Nsungo wakakoshiwa katatu autothubuka tjinyolotjo.

¹³Nzhuzha we nshayi kakale akatjenjela unopinda mambo we nthuntana we tjilengwe, usingatole mikumbulo ye bathu,

¹⁴nenguba akati edwa ku ng'umba ye busungwa kabigwa mambo koga mu bumambo gugwe wakabe azwagwa ali nshayi.

¹⁵Ndakabona bose batjili banoyendayenda mu shango, kang'ompela ne ntjetjana iwouje wakabe akafanila kuma mu bumo gugwe,

¹⁶kwakabe kuna bathu basibashoma ntjetjana ali pezhugwi kwabo bose. Nekwakajalo ibabo banowozha shule abatowon'amutjila. Malebeswa wose ikoku madatha ne kutatana ne phepo.