Read Kalanga Nsumikili 5 Bible Online

Nsumikili 5 - Kalanga bible

Nsumikili 5

¹Utjengete thambo dzidzo ha uyenda ku Ng'umba ye Ndzimu, kusedzela ukateedza kuyita pana kudusa tjibhayilo tje zwilengwe, ngobe zwisingazibe kuti zobezwithama bubi.

²Usitongo tjimbidza wazhula nlomo uwo, kene ukaletja moyo uwo ukaleba limwe dama mbeli kwe Ndzimu, ngobe Ndzimu ukudzimu, iwe umushango, ndizo ita kuti matama awo abe mashomanana.

³Hwope dzozha ne mishingo minji ne hwi le tjilengwe lina matama manjinji.

⁴Ha utuna ku Ndzimu kuti unowouthamila tjimwe, usinonoke kutjithama, ngobe Ndzimu autoshathisiwa nge zwilengwe. Lipa tjaunobe watuna nge kwatjo.

⁵Koyita kusatuna panakuti utune kudwapo usinga lipe.

⁶Usiletje nlomo uwo ukakuthamisa tjibi, kakale usitongo zwiwana uli mu tjimo tjaunowodwa ntumwa we Ndzimu kuti wakabe uzana zo, ini Ndzimu wafanila gwadzilamoyo hwi lilo, ube ukolomola nshingo we maboko awo kene?

⁷Kana ha hwope dzipaphidzika, matama asi e tjimwe anopaphidzika, koga iwe itja Ndzimu.

⁸Ha ubona bashayi betshambilidziwa mu ntuthu, ndulamo ne fanilo dzabo dzitogwa, usitjenamisiwe naikoko, ngobe nlauli ntukunu wakatungamigwa ne nkulu pa nli kakale kuna bamwe ba pezhugwi kwa ibabo.

⁹Kupinda zose, zwimila zwe minda zotogwa na bose na mambo banobhatshiwa bo ndizo.

¹⁰Iye unoda mari aangagutshiwe nge mari, kene unoda fumwa aangawane mimwiso, ikoku naiko bo madatha.

¹¹Ha fumwa ipaphidzika, baji bayo banopaphidzikabo, mweni wayo unobuyigwa ngeni aisi kuilinga nge mesho koga?

¹²Hwope dze nlanda dzozipa, kene unoja kushomana kene kunjinji, koga guta kwe nfumi akutowon'wanisa hwope.

¹³Kuna bubi gwakabangalala gwandakabona mu shango, fumwa mweni yaakazwibigigwa inopelela i nlonga buyendasi,

¹⁴iyeyo fumwa iko mpalalila nge kuishingisa butjapa ngono ana mwana we tjilisana waanowofa esiya asina tjaanatjo.

¹⁵Sekwa akadwa mu ntumbu wa mmeyabe, unowobgwilila ali mbujo sekwa akazha, akuna tje dukuta lile tjaanowo bgwilila akasenga mu maboko.

¹⁶Ikoku naikobo bubi gumwe gunotjenamisa, sekwa akazha, ndiko sekwa anowobgwilila, wakabuyigwa ngeni mukushingila phepo,

¹⁷ne mazhuba awe wose wakaapitsha mu zhalima ne mu buyendasi ne kudziyidzika kukulu ne mu bugwele ne moyo wakagwadza.

¹⁸Bonani, tjandakabona tjakalulwama ntome tjifanila hwuja ne kung'wa ne kushatha mu kushinga kwe mu shango, mu mazhuba mashomana e butjilo gwaakapiwa ne Ndzimu, ngobe ndilo gobe lile.

¹⁹Nthu mmwe ne mmwe bo wakapiwa nge Ndzimu fumwa ne thundu, akapiwa ne simba kuti azwije zwinzipile, ne kuamutjila gobe lile ne kushathila tja akashinga ikoku tjipo tje Ndzimu.

²⁰Ndizo ha atjowoalakana mazhuba e butjilo gugwe ngobe Ndzimu wakampa lushatho gunjinji mu moyo uwe.