Read Kalanga Nsumikili 8 Bible Online

Nsumikili 8 - Kalanga bible

Nsumikili 8

¹Ndiyani unonga nthu wakatjenjela? Kakale ndiyani unoziba tjeneso ye tjithu? Butjenjedu gwe nthu gopenyesa tjiso tjitje, ne buso gugwe gwakafubala goshatha.

²Londolodza nlayo wa mambo, ngoti wakatuna mbeli kwe Ndzimu.

³Usitjimbidze wadwa mbeli kwa mambo. Usime ha ndebo yakabipa, ngobe unoyita tjaanoda.

⁴Ngobe dama la mambo ndilo le bupelo, iko ndiyani ungati kunli, “Unothamani?”

⁵Iye unolondolodza nlayo aangawigwe nge mbhatsha ne nkumbulo we nlume wakatjenjela unowoziba tjibaka ne zila.

⁶Ngoti ndebo i mmwe ne i mmwe ina tjibaka tjayo ne zila yayo, nenguba nthu epawugwa nge mang'oni awe.

⁷Ngekuti aatoziba tjinowobepo, kakale ndiyani unowombudza kuti kowobepo nge zila yakatini?

⁸Akuna nthu una simba pezhugwi pe meya kene una simba le kulaula zhuba le lufu, akuna unosiyiwa ha kuyendiwa ku ngwa, ne bubi agunga sunungule ibabo banoguthama.

⁹Kose ikoku ndakakubona ipapo ndilingisisa ne nkumbulo wangu kose kunoshingwa mu shango, ha bona bathu bakabhatisana kunolema behwisana zogwadza.

¹⁰Kudwapo ndakabona bathu babi be biganyiwa, bakatongobe bengina bebhuda mu Bugalo gwakayengemala, bakabe bekudziwa ha beshinga bubi igogo. Ikokubo madatha.

¹¹Ngekuti kulobgwa shamu kulobegwa nlandu wathamiwa kusinga shingikadziwe tjinyolotjo, mimoyo ye bathu yakazwimisila kuthama mbipo.

¹²Nenguba ntjinyi angathama bubi ka zana (100), e tjila lubaka gulefu, koga ndoziba kuti kowolulwamila ibabo banotja Ndzimu, ngobe banoutja,

¹³koga akutowolulwamila mbimbi, ntome Ndzimu aungathame butjilo gugwe bulefu kufanana ne ntutshi ngobe aatotja Ndzimu.

¹⁴Kuna madatha anoshingikala mu shango, balulwami kwabanoshingikaligwa nge zwithu zwakafanila shingikalila babiibi, kakale kuna babiibi banoshingikaligwa nge zwithu zwakafanila shingikalila balulwami. Ndakati ikokubo madatha.

¹⁵Kwazo ndokulumbidza lushatho, ngobe nthu aana tjibuya mu shango kuzhe kwe ja ne ng'wa ne kuzwishathisa, ikoku kowogala naye mu kushinga kukwe kwe mazhuba e butjilo gugwe gwaakapiwa ne Ndzimu mu shango.

¹⁶Ndakati ndilonga meya mu nyama kushakisisa kuziba butjenjedu ne kubona tjinoshingikala mu shango tjekuti mesho e nthu atobona hwope siku ne sikati,

¹⁷ndipo pa ndakabona yose mishingo ye Ndzimu, kuti nthu aangazwizibe zose zwinoshingikala mu shango. Kutobe nthu angashakisisa nge kwako kungapani, aangake akakuwana nenguba nthu wakatjenjela ezwidwa eti unoziba, aangake akakubona.