Read Kalanga Lumbo gwe Njimbo 2 Bible Online

Lumbo gwe Njimbo 2 - Kalanga bible

Lumbo gwe Njimbo 2

¹Imi ndi luba le Sharoni, ndi luba le mikuku.

²Se luba lipakati kwe mihwa, tjibhayamoyo tjangu tjakajalo pakati kwe baanadi.

³Tjibhayamoyo tjangu tjonga nti we dziapuli, pakati kwe miti imu ishaka, ndoshatha kugala mu ntutshi wawo, ne mitjelo yawo inondizipila kwazo.

⁴Wakandidanila ku ng'umba ye majo ne zwing'o, naka fukidziwa ngubo ye ludo.

⁵Undisimise nge zhambi dzakaswabisiwa, ube undinyatutusa nge dziapuli, ngobe ndogwala gwe ludo.

⁶Ungati luboko gugwe gwe lumeshwe gungabe gulikusi kwe nsholo wangu, ha gwe luji gwakandigumbatila.

⁷Bakololokadzi be Jerusalema, ndomutunisa nge phala ne phalapala dze shango, musitange ludo kuswikila igo guzwilakidza ha gushaka.

⁸I hwi le tjido tje moyo wangu! Bona! Hwouje waswika, etatha edeluka matombo ne matuthu.

⁹Tjibhayamoyo tjangu tjonga phala kene phalanalume. Bonani koga, hwouje umile shule kwe guma, unoshozhela mu mafesitere akazwibhatilila nge makwasayile.

¹⁰Tjido tje moyo wangu tjolebeleka, tjolebeleka tjoti kundili, “Milika nthu wangu mbuya, izha kundili,

¹¹ngobe tjibaka tje mbaba tjakapinda, vula yakana ikapinda.

¹²Maluba woboneka mu shango, tjibaka tjemba tjakotoka ne nlidzo we njiba unohwika mu shango yedu.

¹³Mpaya unozwala phaya, ne mizhambi inopululudza, inodusa kunuhwilila kwayo kunozipa. Milika nthu wangu mbuya, buya ngeno kundili.”

¹⁴Iwe njiba yangu igele pa phaswa dze shongwe, wakabgwata pakasitilika pe phaswa, ima ndibone tjiso tjitjo, ima ndihwe hwi lilo, ngobe hwi lilo lozipilila, ne buso gugo gubuya kwazo.

¹⁵Utibhatile phungubgwe, phungubgwana, dzinotjinya minda ye mizhambi, minda yedu ye mizhambi yopululudza wali.

¹⁶Tjibhayamoyo tjangu nge tjangu, nami ndi watjo, unofudza pkhwizi dzidze mu maluba matjena.

¹⁷Kuswikila zhuba li bhuda ne mitutshi ye busiku itizha, tendebuka, nthu wangu, unge phala kene phalanalume pezhugwi kwe matombo.