Read Kalanga Lumbo gwe Njimbo 3 Bible Online

Lumbo gwe Njimbo 3 - Kalanga bible

Lumbo gwe Njimbo 3

¹Pa ndakabe ndili mu bulawo busiku ndakanshaka, tjido tje moyo wangu, ndakan'vima anshaya, ndakandana, koga akasindidabile.

²Ndowomilika ngwenu ha tendeleka ne nzi nkulu mu dzizila ne mu matengeselo, ndowonshaka iye wandinoda kwazo, ndakan'vima, koga andizombona.

³Balindi bakandiwana, sekwa bakabe beyenda yenda mu nzi nkulu. “Matongobona poni nthu wangu we pa moyo kene?”

⁴Kwakati kusathu kukanoti ngayi ndisinobapinda, ndikabe ndashangana newe pa moyo, ndakan'gumbatila, asitongo nletja kuswikila ndan'kotosa ku nzi wa mme bangu, kunoti ku ng'umba ye wakandizwisenga.

⁵Ndotunisa tjose, imwi bakololokadzi be Jerusalema, nge phala kene phalapala dze shango, musitange ludo, kuswikila guzwilakidza agushaka.

⁶Ndiyani iwowuje waswika unodwa ku tjilambanyika, unonga bhulubusi, lina nnuhwo we mira ne motsha ne zwizholo zose zwe ntengesi kene?

⁷Tjidzobona, i ngwa ya Solomoni! Ina mikwita ye balume bali makumi matathatu (60), mu mikwita ye balume be Iziraela,

⁸bose bakashakatila zwibhayano, bana luzibo gwe ngwa, mmwe ne mmwe akadedela thumo pa thunji akalinda tjibaka tjainowolobana busiku.

⁹Mambo Solomoni wakazwibezhela koloyi ye lukuni gwe Lebanoni.

¹⁰Wakathama zwibhali zwayo nge siliva, kushule yakathamiwa nge golide, tjigalo tjayo tjina mbala nshaba wakabondelela, mukati kwatjo tjakakuyungiwa kunodika ne bakololokadzi be Jerusalema.

¹¹Bhudani imwi bakololokadzi be Ziyoni, mu bone Mambo Solomoni, aka ambala tjiala tjaakambadziwa na mmeyabe mu zhuba le ndobolo iye, mu zhuba le kushatha kwe moyo uwe.