Read Kalanga Lumbo gwe Njimbo 4 Bible Online

Lumbo gwe Njimbo 4 - Kalanga bible

Lumbo gwe Njimbo 4

¹Bona, wakanaka nthu wangu tjidzobona, wakanaka! Mukati kwe lusire mesho awo anonga njiba, mavudzi awo anonga ngubi ye mbudzi, dzidelukila pasi mu mituthu ye Giliyadi.

²Meno awo matjena se pkhwizi hadzi dzadwa pa tesegwa, dzadwa pa ngudziwa, dzose dzakazwala mabili, kusina yafigwa ne mwana.

³Milomo iyo inonga thali shaba, ne nlomo uwo umbuya kwazo. Mukati kwe lusire matama awo i mbabi dze pomegiranate.

⁴Ntshibha uwo unonga thungamakole ya Dafite, yakabakigwa zwibhayano, pakalembeledziwa tjiwulu (1 000) tje zwiviko, zose zwili zwiviko zwe babhayani.

⁵Mazhamu awo bubili gwawo i phalana mbili, mabili e phala dzinofula pana maluba matjena.

⁶Kuswikila zhuba limila ne mitutshi itizha, ndowotizhila ku dombo le mira ne ku duthu le motsha.

⁷Umbuyanana kwazo, tjido tjangu, akuna ndodwa ne itoyi mukuli.

⁸Bhuda nami mu Lebanoni, nlongo wangu; bhuda nami mu Lebanoni. Idwa pezhugwi kwe matombo e Amana, pezhugwi kwe Seniri ne Hemoni, bhuda mu makuwu e shumba, ne matombo e ngwe.

⁹Watola moyo wangu, hazwadzi yangu, nlongo wangu, watola moyo wangu ne kundilinga kang'ompela nge mesho awo, ne ndalama ing'ompela imu tjida tjimu ntshibha uwo.

¹⁰Ludo gugo gozipa seni, hazwadzi yangu, nlongo wangu! Ludo gugo gopinda nkumbi we zhambi, ne nnhuwo we zwizholo zwizo unopinda we zwipayisi.

¹¹Milomo iyo inodothesa butji, nlongo wangu; butji ne nkaka zwikusi kwe lulimi gugo, nnhuwo we zwiambalo zwizo unonga nnhuwo we Lebanoni.

¹²Nnda wakakombeledziwa ndiwe hazwadzi yangu, nlongo wangu nnda wakazhaliligwa, tshime lakashoshiwa.

¹³Thabi dzidzo dzonga nnda we pomegiranate una mitjelo yakanaka, ye hena ina nadi,

¹⁴nadi ne safuroni, kalamusi ne sinamoni, ne miti yose ye motsha, ne mira ne makonde, kose ne zwipayisi zose zwakanaka,

¹⁵nsenya umu nnda, tshime le vula inotjila, ne mikuku inowunga idwa ku Lebanoni.

¹⁶Muka iwe phepo yeku bunandzwa, nawe buya, phepo yeku burwa! Hwuhwudza mu nnda wangu, kuti zwawo zwinonuhwilila zwibhudile patjena. Tjido tje moyo wangu ngatjizhe mu nnda uwe, kuzha kuwoja mitjelo ye zwakakola.