Read Kalanga Lumbo gwe Njimbo 5 Bible Online

Lumbo gwe Njimbo 5 - Kalanga bible

Lumbo gwe Njimbo 5

¹Ndaswika ku nnda wangu, hazwadzi yangu, nlongo wangu, ndotjela mira ne zwipayisi, ndoja mape ne butji gwe nyutji, ndong'wa nkumbi wangu we zhambi ne nkaka. Ijani, imwi bakwinya bangu, mung'we, ing'wani kwakanginilila, imwi badani!

²Ndakayizela, koga moyo wangu wakabe wakalinga. Teedza, wandinoda unokokodza eti, “Undizhulile, hazwadzi yangu, tjido tjangu, njiba yangu, wakapelela, nsholo wangu unadoba le khawa, mavudzi angu azhele madokhwe e busiku.”

³Ndakabe ndakaambula tjiambalo tjangu, ndakabe ndinga tjiambala tjini? Ndakabe ndangula makumbo angu, ndakabe ndowobe ndialongelani shambgwa?

⁴Nthu wangu wakabiga luboko gugwe pa buli le dendele, moyo wangu ukashatha kwazo.

⁵Ndakamilika kuno zhulila tjibhayamoyo tjangu, maboko angu akadubikiwa mu mira, zwinyala zwangu zwidotha mira, udothela mu tjizhuli tje dendele.

⁶Ndakan'zhulila tjido tje moyo wangu, ngono awana ashanduka abgwilila. Ndikatemeka mafupa ngoyenda kukwe, ndakanshaka, ansheta, an'dana, akasindidabile.

⁷Balindi bakandiwana, bali mu kuyenda yenda kwabo mu nzi nkulu, bakandiloba, bakandikubadza, bakanditolela jasi langu, ibabaje balindi be makuma!

⁸Ndomukumbila, imwi bakololokadzi be Jerusalema amungabona nthu wangu, mumbudze kuti ndogwala gwe ludo.

⁹Tjido tjitjo tjopinda bamwe badiwa ngeni, iwe mbuya kupinda bamwe bakadzi? Tjido tjitjo tjopinda bamwe badiwa ngeni, kwa ungatiambila zwingapa?

¹⁰Tjido tje moyo wangu tjokwidzima tjili tjishaba, tjopinda balume bali gumi le zwiwulu (10 000).

¹¹Nsholo uwe i golide mbuyanana nge kwayo, mavudzi awe akazwipomba matema se gungubo.

¹²Mesho awe anonga e njiba dzili pa misenya ye vula, akangudziwa ne nkaka kwakalizanila, agele zubuyanana.

¹³Matama awe anonga minda dze zwipayisi zwinonuhwilila. Milomo iye inonga maluba inodotha mira inowunga.

¹⁴Maboko awe anonga zwikombo zwe golide, zwakanakisiwa nge dayimani. Mbili unonga nyanga dze zhowu dzakakuyungiwa, wakanakisiwa nge mabgwe e safire.

¹⁵Makumbo awe anonga phanda dze alabhasita, dzakagadzikiwa pezhugwi kwe golide. Ndingiko iye ungati Lebanoni, mbuya se misida.

¹⁶Ndebeleko iye inozipa kwazo, unoyemulika kwazo kwazo. Iwoyu tjido tjangu, nzwalani wangu, imwi bakololokadzi be Jerusalema.