Read Kalanga Lumbo gwe Njimbo 6 Bible Online

Lumbo gwe Njimbo 6 - Kalanga bible

Lumbo gwe Njimbo 6

¹Tjayendapi tjibhayamoyo tjitjo, iwe mbuya kupinda bakadzi bose? Tjatendebukilapi tjibhayamoyo tjitjo, kuti ndizo tikushakise itjo?

²Tjibhayamoyo tjangu tjayenda ku nda watjo, ku minda dze zwipayisi, kunofudza mbudzi ne pkhwizi ku minda ne kunotjela maluba.

³Imi ndi tjibhayamoyo tjitje iye tjibhayamoyo tjangu, tjofudza mbudzi ne pkhwizi dzidze pakati kwe maluba.

⁴Wakanaka se Tireza, tjido tjangu, umbuya se Jerusalema, wakabangalala se ngwa yakashakatila.

⁵Usindilinge nge mesho awo, anondidzidzimusa, mavudzi awo anonga ngubi ye mbudzi, dzidelukila pasi kwe matuthu e Giliyadi.

⁶Meno awo anonga ngubi ye pkhwizi hadzi dzadwa pa ngudziwa, dzose dzozwala mabili, kusina ne ing'ompela yafigwa ne mwana.

⁷Matama awo anonga mbabi dze pomegiranate, ha ualinga ali mukati kwe lusiri.

⁸Kuna makumi matathatu (60) e bafumakadzi ne makumi ali zhanakadzi (80) e balongwana ne baanadi basibashoma.

⁹Njiba yangu, mbuya wangu, iye koga, tjido tja mme batjo, tjisina ne nlandu wose kuna wakatjizwala. Baanadi bakambona bakan'dana kushatha, bafumakadzi ne balongwana naibo bo bakan'lumbidza.

¹⁰Ndiyani iwoyu unonga mazhokuyedza, mbuya se mwedzi, unopenya se zhuba, wakabangalala se ngwa yakashakatila?

¹¹Ndakayenda kunda we manongo, kunobona maluba e nkuku, kunobona kene mizhambi yakaluma, ne kuti kene dzipomegiranate dzina maluba.

¹²Kwakati nditjakafala, yemula yangu ikandigadza mu koloyi dze bumambo dze bathu bangu.

¹³Shanduka, shanduka, iwe N'shulamu, shanduka, shanduka ndizo tilinge kukuli. Ini tigalabgwe N'shulamu, se nzano pakati kwe ngwa mbili?