Read Kalanga Lumbo gwe Njimbo 7 Bible Online

Lumbo gwe Njimbo 7 - Kalanga bible

Lumbo gwe Njimbo 7

¹Makumbo awo akanaka ali mu khwebana iwe nkololokadzi wa bahwosi! Zwidzwa zwizo zwakanakilila se ndalama yakathamiwa ne luboko gwe nyambi.

²Ikombo tjitjo lukambana gusingatongosheta nkumbi we zhambi wakashanganyiwa. Ntumbu uwo unonga dolo le koroni, lakakombiwa ne maluba.

³Mazhamu awo mabili anonga phalana mbili dzakazwagwa dzili mabili e phala.

⁴Ntshibha uwo unonga thungamakole yakathamwa nge nyanga dze zhowu. Mesho awo anonga madziba e Heshibhoni, hwunde ne nkoba we Bhatirabhimi. Tjimilo tjitjo tjonga thungamakole ye Lebanoni yakalingisana ne Damasiko.

⁵Nsholo uwo unokukudza se Dombo le Karimeli, vudzi lilo lakalukiwa longa jila le bushaba gwakabondelela, mambo banobhatshigwa mu vudzi lakalukiwa.

⁶Wakanaka kakale unoshathisa seni, iwe tjido, mwanadi unogutsha moyo!

⁷Mbumbiko ye mbili uwo inonga nti we nlala ne mazhamu awo anonga mitjelo yawo.

⁸Ndati, “Ndowotatha nlala anobhata thabi dzawo. Ungati mazhamu awo angafanana ne lutabi gwe zhambi, ne nnhuwo we fema kuko ukanga dziapuli,

⁹ne kuputa kuko kukanga nkumbi we zhambi unong'wika usodzoloka zubuyanana, uwunga pa nlomo ne mu meno.”

¹⁰Ndi we tjido tje moyo wangu, iye unoshaka imi.

¹¹Buya, tjido tje moyo wangu, ngatiyende zwedu ku shango, tinogalazwedu ku mizi ya kanyi,

¹²ngatitjimbidze tayenda ku minda ye mizhambi, tinobona kene zhambi dzakaluma, kene maluba e zhambi akazhulika nekuti kene dzipomegiranate dzina maluba. Ikweno ndowokupa ludo gwangu.

¹³Malolo anodusa nnhuwo wawo, pa mikoba yedu kuna mitjelo yose yakanaka, mitshwa ne mikulukugwe, yandakakubigila iwe tjido tje moyo wangu.