Read Kalanga Lumbo gwe Njimbo 8 Bible Online

Lumbo gwe Njimbo 8 - Kalanga bible

Lumbo gwe Njimbo 8

¹Ungati ungabe uli hazwadzi kundili, wakamwa zhamu la mme bangu! Ha ndakabe ndashangana nawe kuzhe, ndobe ndakakuputa, kwakabe kusina mmwe wakabe angandilingila pasi.

²Ndabe ndowokutungamila akuzhisa mu ng'umba ya mme bangu, mukati kwe ng'umba ya iye wakandidiya, ndabendowokupa nkumbi we zhambi wakalongwa zwipayisi kuti ung'we ne nkumbi we dzipomegiranate.

³Ungati luboko gugwe gwe lumeshwe gungabe guli pasi kwe nsholo wangu, gwe luji gwakandigumbatila!

⁴Ndomukumbila, imwi bakololokadzi be Jerusalema, kuti musitongo shoka kene musa ludo kuswikilila gwada igo.

⁵Ndiani iwouje waswika kudwa ku tjilambanyika, akasendama mu tjido tje moyo tjitje? Ndakakumusa ulikusi kwe nti we dziapuli. Ipapo ndipo mmeyabo pa bakakuzibula, ipapo iye wakakuzwala wakakuzibula.

⁶Undiyite se rin'gi mu moyo uwo, se rin'gi pa luboko gugo; ngobe ludo gwakasima se lufu, ndandala ihwukutu se ikumbu, Pisa kwago hwupisa kwe moto, uli bhuba lakabangalala.

⁷Vula njinji aitogupkhwisa nyota ye ludo, ne vula ye gubakube aingagunyaladze, nenguba nthu angapa fumwa yose ye ng'umba iye kuti awane ludo, ungadadigwa kwazo.

⁸Tina tjinung'una tjedu tje tjisikana, atjina mazhamu. Tingathamilani tjinung'una tjedu wali, zhuba latjinowokumbigwa?

⁹Ha tjili guma, towobaka pa nsholo watjo shongwe ye siliva ngono ha tjili nkoba, towotjikombeledza ne mapulanka e nsida.

¹⁰Ndakabe ndili guma mazhamu akabe enga thungamakole, ipapo ndakabe mu mesho awe ndifanana ne nthu unozhisa kunyalala.

¹¹Solomoni wakabe ana nnda we mizhambi ku Bhaale Hamoni, Wakasayidza nnda iwoyo batjengeti, eti mmwe ne mmwe wabo anlipe zwiwulu (1 000) zwe siliva, mu mitjelo yaakatjela.

¹²Nnda wangu we mizhambi, iwo wangu, nde wangu, iwe, Solomoni, ungana ukabe ne tjiwulu (1 000), batjengeti be mitjelo mazana mabili (200).

¹³Iwe unogala mu minda, bakwinya bangu bakateedza hwi lilo, ima ndilihwe.

¹⁴Tjimbidza, tjibhayamoyo tjangu, unge phala kene phalanalume, pezhugwi kwe matombo e zwipayisi.