Read Kalanga Isaya 1 Bible Online

Isaya 1 - Kalanga bible

Isaya 1

¹Mbono ya Isaya nkololo wa Amozi yaakabona ngekwe Juda ne Jerusalema mu misi yakabe kubusa Uziya ne ya Jothamu ne ya Ahazi ne ya Hezekiya bomambo be Juda.

²Hwilila iwe kudzimu, nawe shango zhula zebe, ngoti Yahwe balebeleka bakati, “Ndakalela bana abakudza, koga bakandipandukila.

³Ngabe inoziba mweni wayo, donki ikaziba painojisigwa nge mweni wayo. Koga Baiziraela abatoziba, bathu bangu abatohwisisa.”

⁴Yee mme wee! Mapalala imwi ludzi gunotjinya, bathu banolemegwa nge zwibi, ludzi gwe bashingi be bubi, bana bakazwipa mbipo. Bakafupatila Yahwe, belasha Wakayengemala we Iziraela, be ufupatila tjose.

⁵Apa ini mungabe mutjalobgwa kene? Ini mudwilila mupanduka kene? Nsholo wose unogwadza, ne moyo wose unotimbama.

⁶Kudwila mu tshambo le gumbo kunoti ku nsholo uwo akuna tjipenyu, kuzhele mbonje ne kusubuka, ne malonda akapubuka asakasukiwa, kene kuli kuzwimbiwa nge tjimwe, asina tjaakazhodziwa.

⁷Shango yenyu yakashakadziwa, mizi yenyu mikulu yakapisiwa nge moto, minda yenyu inothukudziwa nge bataya mu mesho enyu, yakashakadzika mukanga semakundiwa, nge badwakule.

⁸Nkololokadzi we Ziyoni wakasiyiwa se nshasha umu nnda we mizhambi, se thumba imu nnda we mabisi, se nzi nkulu wakakombiwa nge zwita.

⁹Kuzhe kwe kuti Yahwe Masimbawose babe bakatisiyila malimbelimbe, tingabe takanga Sodoma, tikafanana ne Gomora.

¹⁰Ihwani dama la Yahwe, imwi babusi be Sodoma, muteedze nlayo we Ndzimu wedu, imwi bathu be Gomora.

¹¹Yahwe bakati, “Bunjinji gwe zwibhayilo zwenyu godwani kundili kene? Ndakaamutjila kunopinda tjilizanyo kwe zwibhayilo zwinopisiwa, zwe nyundo ne tshulo dze zwithuwo zwakakodziwa. Anditoshathila malopa e mikono ne pkhwizi ne mbudzi.”

¹²Amuzha mbeli kwangu, ndiyani wakakushaka ikoku, kutshamba tshamba misha yangu kene?

¹³Misani kuzhisa zwibhayilo zwisina nshingo. Motsha wenyu unoshimika kundili. Mizano yenyu ye Mwedzi ugala, ne mazhuba enyu e Sabata, ne mishangano yenyu mibiibi andingamilane nayo.

¹⁴Ndoshima Mizano yenyu ye Mwedzi ugala, ne mimwe mizano yakabigwa mu misi yayo. Yabe mitolo kundili, ndanyala ngosengana nayo.

¹⁵Mowoti mumilidza maboko enyu, mutembezela ndowozwimba mesho angu, kene mukatembezela mitembezelo minjinji, anditowoteedza, ngoti maboko enyu azhele malopa.

¹⁶Ngulani mube babuyanana. Dusani mishingo yenyu yakabipa, mu mesho angu. Misani kuthama mbipo,

¹⁷muzwidiye kushinga zwakanaka, shakani kutambunuka, mubhatshe banotshambilidziwa. Mumile fanilo dze siyang'wa, ne tjilikadzi mudzilebelekele.

¹⁸“Izhani sakuno tilebeleke koleba Yahwe. Zwibi zwenyu kene zwili zwishaba se malopa, zowobe zwitjena se kapuku, kene zwili zwishaba kwakabondelela, zowonga wulu.

¹⁹Ha muda kakale muhwa, mowoja zwibuya zwe shango,

²⁰koga ha mulamba mu panduka, mowolobesiwa nge thumo, ngoti Yahwe baleba.”

²¹Bonani nzi wakabe ugalikabgwe, washanduka tjini ukabe fukula. Wakatongobe una kusumikilisa nge malebeswa, ndulamo yakatongobe ili yapo muuli, koga ngwenu babulayi koga.

²²Siliva iyo yabe malala, nkumbi uwo we zhambi washanganyiwa ne vula.

²³Babusi babo babe bapanduki, babe bakwinya be mbava, banoda kupiwa tjizwimba nlomo, bakada kupiwa zwipo. Abatobhatsha siyang'wa, kene kuli kukumbula tjilikadzi.

²⁴Ndizo wali She, Yahwe Masimbawose, ibo Masimbawose be Iziraela banolebeleka beti, “Ee, ndowolakidza bushongola mu zwita zwangu, ndowozwibgwilizilila mu zwita zwangu.

²⁵Ndowokutolela thambo, ndowodusa manyiri awo nge buzhalo, adusa shambgwa iyo yose.

²⁶Ndowobuza basumikilisi babo bakanga ibabaje be kutanga, bakumbuludzi babo babe se be kutanga. Shule kwa ipapo unowodang'wa nzi nkulu we ndulamo, nzi nkulu unogalamoyo.”

²⁷Ziyoni unowodzutunugwa nge kwakatambunuka, muuli banoshanduka banowodzutunugwa nge ndulamo.

²⁸Koga bapanduki ne babi banowolobesiwa, naibabo banosiya Yahwe banowopedzisiwa.

²⁹Mowobhakhwa nge shoni ngekwe mioko, yamunoshathila, mowobhatisiwa shoni ngekwe minda, ya makashalula.

³⁰Mowofanana ne n'oko unobuna mazhani, mukanga nnda usina vula.

³¹Nthu wakasima unowonga bushwa gwakawoma, mishingo iye ikanga sasi, ndizo kose kowotshwa, kusina unokudzima.