Read Kalanga Isaya 10 Bible Online

Isaya 10 - Kalanga bible

Isaya 10

¹Yee mme wee! Bapalala ibabo banothama milayo yakabipa, banokwala milayo inotshambilidza bathu,

²kudzibila bashayi zwakabalingisana, kutolela bashayi bapakati kwe bathu bangu fanilo dzabo kuti bathame tjilikadzi thundu dzabatapa betolela siyang'wa.

³Mowothamani mu zhuba lamunolobgwa kene, mu zhuba le mbatsha dzinozha dzidwa kule? Mowotizhila kuna ani kuti mu bhatshiwe kene? Fumwa yenyu kee, moisiya poni?

⁴Akuna tjamusalila akusi kuzwiyisa pasi pakati kwe basungwa kene pakati kwe babulawa. Nenguba kwakajalo kugwadzamoyo kwabo akuzopela, luboko gwabo gutjakamilikila kuloba.

⁵Yee mee wee! Wapalala iwe Asiriya lukombo gwe kugwadzamoyo kwangu, iwe ikombo tje bushongola gwangu!

⁶Ndontuma kubhayana ne itjaba tjisina Ndzimu, ndontuma kubhayana ne bathu bandakagwadzila moyo kutapa ne kutolela thundu ne kubatshambila pasi se dope limu zila.

⁷Koga Asiriya aizozwimisila ikoku, aitokumbula saikoku, koga mazwimisilo ayo hwukolomodza ne kulobesa zwitjaba zwinjinji

⁸ngoti unoti, Apa batungamili bose be babhayani bangu ate bomambo bose kene?

⁹Apa nzi nkulu Khalino autonga we Karikhemishi kene? Nzi nkulu we Hamati autonga we Aripadi kene? Apa nzi nkulu we Samariya autonga we Damasiko kene?

¹⁰Se luboko gwangu gwakakunda mibuso ye midzimu ye zwifaniso zwakabe zwili zwikulu kupinda zwe Jerusalema ne Samariya,

¹¹apa andingathame mu Jerusalema ne midzimu yawo ye manyepkhwa tjandakathama mu Samariya ne zwifano zwawo kene?

¹²Kowoti She bapedza nshingo wabo wose mu Dombo le Ziyoni nemu Jerusalema banowoloba mambo we Asiriya unozwikudza mu kuzwida kukwe.

¹³Ngoti iye unoti, “Ikoku ndakakuthama nge matatabuko angu nenge butjenjedu gwangu ngoti ndina kuhwisisa. Ndakakolomodza migathu ye zwitjaba atapa fumwa dzabo, ndakanga nkono wakasima adelusila pasi bagele mu zwigalo zwe bumambo.

¹⁴Luboko gwangu gwawana fumwa se shaka fumwa ye zwitjaba ngono se bathu bekubunganya mabumbulu asiyiwa, sayikoko ndakubunganya shango yose, ngono akuna tjakazunguza bhapilo kene tjikazhula nlomo kene tjikalila.”

¹⁵Apa shathu linga zwikudza pana unotema nalo kene? Kene saha inga zwikudza pana unoshinga nayo kene? Apa shamu ingashingisa unoimilidza kene, kene lukombo igo gungamilidza iye usi lukuni kene?

¹⁶Ndizo wali She, Yahwe Masimbawose banowotuma bugwele gunotjinya ku babhayani babe bakasima, kusi kwe gudzo lile bakabhatidza moto unothuta.

¹⁷Tjedza tje Iziraela tjowobe moto, Wakayengemala wabo unowobe nthuto, unowopisa ukalotesa mihwa iye ne zwishosho zwizwe mu zhuba ling'ompela.

¹⁸Gudzo le ishaka tjitje ne shango iye ina zwizwalo, Yahwe banowokolomodza kose meya ne mmbili kowofanana koga ne nthu unogwalilo fa.

¹⁹Matshinde e miti ye ishaka tjitje anowobe ali mashomanana kwaangabagwa ne mwana.

²⁰Mu zhuba ilelo malimbelimbe e Iziraela ne batjila be nsha wa Jakubo abatowobe batjabiga munli iwoyo wakabaloba, koga banowobiga muna Yahwe, Nyengemali we Iziraela mu malebeswa.

²¹Malimbelimbe anowoshanduka, malimbelimbe a Jakubo eshandukila ku Ndzimu wakasima.

²²Nenguba bathu benyu Iziraela bali banjinji se nsetje we gungwa, kowobuya malimbelimbe koga. Golomodzo lakalauligwa, kukolomodza ikoku kuzhele ndulamo.

²³Ngoti She Yahwe Masimbawose banowothama bheledzo lizhele sekwakwakalaugwa pakati kwe shango yose.

²⁴Ndizo She, Yahwe Masimbawose bakati, “Imwi bathu bangu banogala mu Ziyoni, musitje Baasiriya ha beloba nge lukombo, bemumilidzila swimbo sekwakathama Baegipiti.

²⁵Kohwoti mu tjibaka tjifutshwanana kugwadzamoyo kwangu kowopela, bushongola gwangu gowolingisanyiwa nge golomodzo labo.

²⁶Yahwe Masimbawose banowobaloba nge rwabha kube kufanana nge sekwabakaloba Midiyani pa shongwe ya Orebhu, lukombo gwabo gowobe pezhugwi kwe gungwa, banowogumilidza sekwabakathama mu Egipiti.

²⁷Ngono mu zhuba ilelo ntolo wabo unowodwa mu mathudzi enyu ne jokwi labo lowodusiwa mu mitshibha yenyu.” Bakamilika bebhuda mu Rimoni,

²⁸bakazha mu Ayati bakapinda bepalama Migironi, ku Mikimashi bakabiganya thundu yabo,

²⁹bakatjuluka zila, bakapitsha busiku mu Geba. Rama ikatetema, Gibiya nzi wa Saulo wakatizha.

³⁰Lilila pezhugwi iwe nkololokadzi we Galimu! Hwilila iwe Layishi! Undabile iwe Anatoti!

³¹Madimena unotizha, bagali be Gebimu banotizha kunobgwata.

³²Munalino zhuba banowoma mu Nobhu, banowozunguzila veisi yabo dombo le nkololokadzi we Ziyoni, duthu le Jerusalema.

³³Lingani She, Yahwe Masimbawose banowovuna thabi nge masimba anotjenamisa. Miti yakakula milefu inowotemegwa pasi, milefulefu inowoyisiwa pasi.

³⁴Banowotema nge shathu miti yakalobana mu ishaka. Lebanoni ne miti yayo yakakula inowowa.