Read Kalanga Isaya 11 Bible Online

Isaya 11 - Kalanga bible

Isaya 11

¹Tjitsha tja Jesi tjowothinila, lutabi gowokula gudwa mu midzi iye gukazwala mitjelo.

²Meya ya Yahwe inowogala munli, meya ye butjenjedu neye hwisiso, meya ye gumbuludzo ne simba, meya ye luzibo ne kutja Yahwe.

³Ngono kushatha kukwe kowobe mukutja Yahwe. Aatowosumikilisa nge bona kwe mesho awe, kene kuli kuwidza ndebo nge hwa kwe zebe dzidze.

⁴Koga unowosumikilisa bashayi nge ndulamo, unopedzisa ndebo nge lubu mu kusumikilisa bashayi ne shango, ngono unowoloba shango nge shamu ye nlomo uwe, nge mafemo e milomo iye unowobulaya babi.

⁵Ndulamo inowobe mwandabula we thunji dzidze, kugalikabgwe kukabe mwandabula we thunji dzidze.

⁶Phele inowogala ne pkhwizana, ngwe iyo inowobutha ne mbudzana, phulu ne shumbana ne zwithuwo zwakakodziwa zowobutha pathu pang'ompela, ngono mwana ntukununu unowozwitungamila.

⁷Ng'ombe hadzi ne bhira zowoja pathu pang'ompela, bana badzo banowobutha bose, shumba inowoja bushwa se ng'ombe.

⁸Mwana unomwa unowozanila pa mwina we ipakupaku, mwana wasiya zhamu unowolonga luboko mu zwimba le thumbi.

⁹Azwingakubadze kene kuli kutjinya mu dombo langu lose lakayengemala, ngoti shango inowobe ili zhele kuziba Yahwe se vula yakaanga gungwa.

¹⁰Mu zhuba ilelo n'dzi wa Jesi unowoma uli tjilakidzo mu zwitjaba, zwitjaba ndiye wazwinowoshaka, magalo awe anowolumbidzwa.

¹¹Mu zhuba ilelo She banowotambunudza luboko gwabo kakale gwe bubili kubuza malimbelimbe e bathu babo kudwa mu Siriya ne mu Egipiti ne mu Patirosi nemu Itopiya nemu Elamu nemu Shinari nemu Hamati ne kudwa mu shango dzimu tjekelo dze gungwa.

¹²Banowomilidzila zwitjaba tjilakidzo, ngono banowokubungaya bakapalala be Iziraela bakakubunganya be Juda bakapaladziwa kudwa mu mbizho nna dze shango.

¹³Fupa la Ifureimi lowopela, naibabo banokwebakweba Juda banowothubugwa, Ifureimi aatowothamila Juda fupa, Juda iye aatowokwebakwebana na Efureimu.

¹⁴Koga banowodzatila mu mathudzi e Bafilisitiya ku golombedzo, bubili gwabo banowotapila bathu be ku bhezhuba. Banowotambunudza luboko gwabo kubhayana na Edomu ne Moabu, ngono Baamoni banowobahwa.

¹⁵Yahwe banowowomesa gorokoro le gungwa gwe Egipiti, ngono banowozunguza luboko gwabo pezhugwi kwe Gwizi gwe Yufuratesi nge phepo inopisa, banowoguthubukanya gukabe ngolo dzili kutendeka kuti bathu batjuluke pakawoma.

¹⁶Ngono kowobe ne zila hwulu kudwa ku Asiriya inoyenda malimbelimbe akasala e bathu bawo, sekwakabe kuli iko nge Iziraela pabakabhuda mu shango ye Egipiti.