Read Kalanga Isaya 13 Bible Online

Isaya 13 - Kalanga bible

Isaya 13

¹Mbono yakabongwa ndi Isaya nkololo wa Amozi ngekwe Bhabhiloni.

²Milidza tjilakidzo pezhugwi kwe dombo lakaambuka, ubamimilile kwazo; ubawebe nge tjiazha kuti bangine nge mikoba ye banokudziwa.

³Imi nge kwangu ndadwa bakayengemala bangu, ndadana babhayani bangu bakasima kuti bashingikadze kugwadzamoyo kwangu, banozwikudza nge kwangu.

⁴Teedza, zhoba pezhugwi kwe matombo, inonga zhoba ye mbunga usinshoma! Teedza phipiti ye mibuso, inonga ye njudzi dzikubungana! Yahwe Masimbawose banolulwamisila babhayani ngwa.

⁵Banozha bedwa ku shango ikule, banodwa ku phelelo dze kudzimu, Yahwe ne zwibhayano zwe kugwadzamoyo kwabo, kukolomodza shango yose.

⁶Bokolelani ngoti zhuba la Yahwe labe pejo, lozha se golomodzo linodwa kuna Masimbawose.

⁷Ndizo wali maboko wose anowoteduka, nthu mmwe ne mmwe unowotemeka mafupa,

⁸ngono banowonyala moyo. Zogwadza ne shungu zowobawila, banowomanukigwa se nkadzi umu thumbgwa. Banowolingana bakakaabala, njiso dzabo dzitukutila ngotja.

⁹Bonani zhuba la Yahwe lozha, nge bushongola ne kugwadzamoyo kunotjisa, kuthukudza shango ne kulobesa batjinyi muili.

¹⁰Ngoti nyenyedzi dze zhuzhugwi ne majinjitshi adzo adzitowopenyesa tjedza tjadzo, zhuba lowotizwititi pakubhuda kwalo ne mwedzi awutowopenyesa tjedza tjawo.

¹¹Ndowolobela shango bubi gwayo, ne babiibi zwibi zwabo. Ndowopedzisa kuzwida kwe banozwikudza, ndowoyisa pasi kuzwimilidza kwe basina ngoni.

¹²Ndowothama kuti bathu basiwanike se golide mbuya, ludzi gwe nthu gowosheteka kupinda kusheteka kwe golide ye Ofira.

¹³Ndizo ndowothama kuti kudzimu kuteteme, ne shango itsheduke mu magalo ayo nge bushongola gwa Yahwe Masimbawose mu zhuba le kugwadzamoyo kwabo kukulu.

¹⁴Kufanana ne phala inovimiwa kene pkhwizi dzisina ungadzikubunganya, mmwe ne mmwe unowobgwilila kuna bakanyi kwabo, ngono mmwe ne mmwe unowotizhila ku shango ya kanyi kwabo.

¹⁵Iye unowowang'wa unowobhayiwa, iye wabhakhwa unobulawa nge thumo.

¹⁶Bana babo banowopkhwanyigwa mu mesho abo, ng'umba dzabo dzowotapigwa ne bakadzi babo bakadzugwa.

¹⁷Bonani, ndodzonga Mediya kugwa nabo, bathu basina hanya ne siliva basingashathile golide.

¹⁸Matati abo anowobulaya bazhuzha, abatowobe ne ngoni mu ntjelo we tjibumbilo, abatowohwila zogwadza bana.

¹⁹Ngono Bhabhiloni, gudzo le mibuso, bubuya ne kuzwikudza kwe Bakhaladiya kowofanana ne Sodoma ne Gomora tjibaka Ndzimu tjawakabalobesa.

²⁰Autowofa wagagwa kene kuli kubakwa muuli kuyenda nge zwizekugwana zose, akuna N'arabu unowobaka nshasha uwe ikoko, akuna nlisi unganyalulusa pkhwizi dzidzeko.

²¹Koga phuka dze shango dzowolala ikoko, ne ng'umba dzawo dzowozhala phungubgwe, ne mafukumudzi anowogala ikoko, ne meya mibi ye midzimu ye mbudzi dze shango inowozana ikoko.

²²Phele dzowolila mu matizhilo awo, phungubgwe dzowolila mu ng'umba dzawo dze bushe. Tjibaka tjawo tjabe pejo, mazhuba awo aatjowodwilidziwa.