Read Kalanga Isaya 14 Bible Online

Isaya 14 - Kalanga bible

Isaya 14

¹Yahwe banowohwila ngoni Jakubo, ndizo wali banowoshalula Baiziraela kakale ngono bakabagadza mu shango yabo, bazhi banowozwishanganya nabo bakabhatana ne ng'umba ya Jakubo.

²Zwitjaba zowobatola zwikabayisa ku magalo abo, ngono Baiziraela banowobathuwa mu shango ya Yahwe, banowobe balandalume ne balandakadzi babo. Banowotapa ibabo bakatongo batapa, bakabusa ibabo bakatongo batshambilidza.

³Kowoti mu zhuba Yahwe labamunyalulusa mu kudziyila kwenyu ne mu phipiti ne kushinga kunolema kwamakashingisiwa,

⁴ipapo mowokuwelela mambo we Bhabhiloni sahwoku: “Ntshambilidzi waswika mu bhelelo lile! Bushongola guna bukomba gwapela!

⁵Yahwe bavuna lukombo gwe mbiimbi, ludozo gwe bushe gwe babusi,

⁶igo gwabakaloba bathu ndigo bakagwadzamoyo beloba nge kusingame, igo gwakabusa njudzi nge bushongola nge kudziidza kusina ngoni.

⁷Shango yose yakanyaluluka yakatebama, bathu banomilidza bemba.

⁸Miti ye misipurasi inoshongozhela ngekwenyu, misidara ye Lebanoni yakashatha inoti, ‘Tjinga kwawakalala pasi akuna ntemi unozha kuhwotitema.’ ”

⁹Bugalo gwe bafi pasi gozunguzika kukushanganidza ha uzha, gomusa mitutshi kukulebesa, bose bakabe bali batungamili be shango, tjobamilidza mu zwigalo zwe bumambo, bose bakabe bali bomambo be njudzi.

¹⁰Bose banowolebeleka ngono banowoti ku kuli: “Nawe auzotjasimabo saswi! Wafanana koga naswi!”

¹¹Kuzwikudza kuko kwayisiwa pasi ku bugalo gwe bafi ne misindo ye zwilidzo zwizo, wonye dzabe bulalo kusi kuko, ne wonyana dzabe ngubo iyo.

¹²“Sekwawakawa ndiko kudwa kudzimu, iwe nyenyedzi ye kuyedza, iwe nkololo we mazhokuyedza! Sekwawathubugwa ukalashigwa pasi, iwe wakatongo ladza zwitjaba pasi!

¹³Wakati ukati mu moyo uwo, ‘Ndowotathila kudzimu, zhuzhugwi kwe nyenyedzi dze Ndzimu, ndowogadza tjigalo tjangu tje bumambo zhuzhugwi, ndowogala mu dombo le nshangano kule ku bunandzwa.

¹⁴Ndowotathila pezhugwizhugwi kwe makole, ndowozwithama anga Upezhugwizhugwi.’ ”

¹⁵Koga wayisiwa pasi ku bugalo gwe bafi, mu phelelo dze gomba.

¹⁶Banowokubona banowokukaabalila, bakakumbula nge kuko beti: “Apa ndiye nlume wakathama shango ikatetema iwoyu, ndiye kene wakazunguza mibuso?

¹⁷Apa ndiye wakathama shango ikanga tjilambanyika, kakolomodza mizi yayo mikulu kene? Ndiye wakabe asingaletje batapiwa babe bakayenda kanyi kene?”

¹⁸Bomambo bose be njudzi balele mu gudzo, mmwe ne mmwe wabo mu ikumbu tjitje,

¹⁹koga iwe walashigwa kuzhe kwe ikumbu tjitjo se lutabi kusingashakike, wakafukidziwa ne bafi bakabhayiwa ne thumo, ibabo banodelukila ku mabgwe e gomba, se itumbu tjinotshambiwa nge makumbo.

²⁰Awutowobiganyiwa kang'ompela nabo, ngoti wakakolomodza shango iyo, wakabulaya bathu babo. “Bana be babiibi akutjowolebgwa nge kwabo kakale.

²¹Lulwamisilani kulilita bakololo babe ngekwe nlandu wa botate babo, basitongodwa bemilika betola shango, bebe bedwa bezhadza shango nge mizi mikulu.”

²²Yahwe Masimbawose bakati, “Ndowomilika abhayana nabo. Ndowolobesa zina le Bhabhiloni ne malimbelimbe, bana nenge ludzi, Kolebeleka Yahwe.

²³Ngono ndowouthama magalo e shoni, ne madziba e vula, ndowoulonga ntshwailo we golomodzo, kolebeleka Yahwe Masimbawose.”

²⁴Yahwe Masimbawose bakatuna bakati: “Sekwandakalongolosa ndiko kunowoshingikala, ne tjandakazwimisila nditjo tjinowobe itjo.

²⁵Ndowolobesa N'asiriya mu shango yangu, ngono ndowontshamba nge makumbo pezhugwi kwe matombo angu, jokwi lile lowobhuda mu bali ne ntolo uwe unowodusiwa mu mathudzi abo.”

²⁶Awa ndiwo mazwimisilo azwimisigwe ngekwe shango yose, ikoku tjiazha tjakatambunudzigwa njudzi dzose.

²⁷Ngoti Yahwe Masimbawose bazwimisila kuthama ikoku, ngono ndiyani kene ungabamisa? Luboko gwabo gwakatambunuka, ndiyani ngono ungagubuza?

²⁸Mu gole lakafa Mambo Ahazi kwakazha ndaidzo eyi:

²⁹“Musishathe imwi mose Bafilisitiya, ngoti ikombo tjakamurutha tjavunika, ngoti kudwa mu ndzi we nyoka kobhuda itumbimilidzo, mu mabumbulu atjo kube kubhuda bhophoma linowuluka.

³⁰Mbano ye nshayi inowowana zojiwa, ne unosheta unowolala akabakililika, koga uwo ndzi ndowoubulaya nge bhamba, ne malimbelimbe awo ndowoabulaya.

³¹Amba, iwe nkoba, iwe nzi nkulu lila, pelegwani nge simba imwi mose Bafilisitiya! Ngoti busi wogu godwa ku bunandzwa, ngono akuna umile ega mu babhayani babe.”

³²Dabilo ndiipi ingapiwa thumwa dze ludzi igogu kene? “Yahwe ndibo bakabamba Ziyoni, ndizo muuli bathu bawo badziidziwa banowowana dizhilo.”