Read Kalanga Isaya 16 Bible Online

Isaya 16 - Kalanga bible

Isaya 16

¹Yisani pkhwizana guli lukhetho ku mbusi we shango, kudwa ku Sela nge zila ye tjilambanyika beyenda ku dombo le nkololokadzi we Ziyoni.

²Se bakololokadzi be Moabu banonga nyuni dzilobanya mapapilo, banonga majindana apaladziwa mu mashaka bali ku maambuko e Arinoni.

³Kumbuludzani, tambunudzani zwithu. Thamani mitutshi yenyu inge busiku masikati makulu. Sumbikani balashiwa, musitongo zumbunula batizhi.

⁴Letjani balashiwa be Moabu babe balubili pakati kwenyu, ngabatizhile nkolomodzi mu muli. Kowoti ntshambilidzi asitjipo, ne golomodzo lama, naiye unotshamba nge makumbo asitjipo mu shango,

⁵ipapo tjigalo tje bumambo tjowobigwa mu ludo gusingazunguzike, ngono mutjili kowogala unogalikabgwe kudwa mu nsha wa Dafite iye unosumikilisa nge kwakatambunuka elibilidza kuthama ndulamo.

⁶Iswi takahwa nge kuzwida kwe Moabu, kuti yakabe izwida kungapani, kuzwikudza, kuzwida ne bukomba gwayo, koga kuzwiloba ifuba kwayo ngekwe manyepkhwa.

⁷Ndizo wali letjani Moabu ilile, ne mmwe ne mmwe ngaalilile Moabu. Lilani nge buyendasi, mulilila zhambi dzakakobogwa dze Kirihariseti.

⁸Ngoti minda ye Heshibhoni inowoma ne mizhambi ye Sibima, botetshi be zwitjaba bakatemela pasi thabi dzayo, yakawanda kunoti ku Jazera ibe izwiwandisa kunoti ku tjilambanyika, midzi yayo ikatandabalila seli kwe gungwa.

⁹Ndizo ndolila ne balili be Jazera belilila mizhambi ye Sibima, ndokunyolodza nge mishodzi iwe Heshibhoni nawe Elealehi ndomunyolodza nge mishodzi, ngoti mima ye ngwa yakawila mitjelo ne zwivuno zwenyu.

¹⁰Kupembela ne kushatha kwakadusiwa mu minda inoti ikadusa zojiwa, ne mu minda ye mizhambi akuna njimbo dzinombiwa, akuna mima inohwika akuna nswini unoswina nkumbi mu iswino mima yanyalala.

¹¹Ndizo meya yangu inolilila Moabu se tjilidzo, moyo wangu unolilila Kiriheresi.

¹²Kowoti Moabu izwilakidza, izwinyadza ngotathila ku bugalo gupezhugwi, izha kutembezela ku bugalo gwayo gwakayengemala, akutowoidwila tjimwe.

¹³Ileli ndilo dama lakalebgwa ndi Yahwe ngekwe Moabu mu tjibaka tjakapinda.

¹⁴Koga ngwenu Yahwe bakati, “Mu makole matatu anonga makole e nlanda wakasungwa nge tjidumano, gudzo le Moabu lowolengudziwa kusina tjimwe nge bathu bayo banjinji. Banowobe batjila basala banowobe bali bashomanana kwazo kakale basakasima.”