Read Kalanga Isaya 17 Bible Online

Isaya 17 - Kalanga bible

Isaya 17

¹Dama ngekwe Damasiko. Bonani, Damasiko autjawobe nzi nkulu, unowobe matuluthulu e matongo.

²Mizi mikulu ye Aroeri inowofulukigwa tjose, inowobe malalo e zwithuwo ngono akuna tjinozwitjisa.

³Mizi ye matizhilo inowopela mu Ifureimi, ne bumambo gowopela mu Damasiko, malimbelimbe e Aramu anowonga gudzo le Baiziraela. Koleba Yahwe masimbawose.

⁴Ngono mu zhuba ilelo gudzo la Jakubo lowoyisiwa pasi, ne mmbili uwe wakakola unowowonda.

⁵Ngono kowofanana ne nvuni evuna mathunde amile ngono evuna zwiyako nge maboko, kube kunga nthu unonunga zwiyako zwe mathunde asalila pa kuvungwa mu Nkuku wa Refaimu.

⁶Masalila anowosala muuli, kufanana ne ntoba wapugwa, kube kusala mitjelo mibili kene mitatu mu thabi dzipezhugwizhugwi, kene minna kene mishanu mu thabi dzitjapasi dze nti we mitjelo. Koleba Yahwe Ndzimu we Iziraela.

⁷Mu zhuba ilelo bathu banowoziba Mbumbi wabo ne mesho abo anowolinga kuna Wakayengemala we Iziraela,

⁸abatowolinga ku zwibeso zwe zwibhayilo, zwabakathama nge maboko abo, abatowolinga kuna zwakathamiwa nge zwinyala zwabo, kene kuli kulinga kuna Ashera kene kulinga ku zwibeso zwe motsha.

⁹Mu zhuba ilelo mizi mikulu ye matizhilo abo inowonga magalo e Bahivite ne Baamori yabakasiya betizhila ku zwishaka betizha bana be Iziraela, ngono inowobe matongo.

¹⁰Ngoti makakangang'wa Ndzimu we jidzo lenyu, mukasikumbule Shongwe ye butshilo gwenyu, ndizo ne mukadzwala zwidzwalo zwakanaka mube mudzikila matadzwana kuthigamila midzimu ipoga,

¹¹kene mungathama kuti ikule mu zhuba ilelo lamaidzwala, mube muthama kuti izwale mu mangwanana amaidzwala akuna tjinowovungwa muili mu zhuba le kudziyila nele zogwadza zwisingapodzeke.

¹²Yee mme wee, kohwika nsindo we bathu banjinji, nsindo wabo unonga we makungwa! Kubomba kwe njudzi, konga kusuma kwe vula njinji!

¹³Njudzi dzowona se vula ye mabilila njinji, koga Ndzimu unowozwitjemela, ngono zowopalalila kutjena se bunye gupaladziwa ne phepo pezhugwi kwe matombo se malala ewulusiwa nge tjampupudze mu dutu.

¹⁴Mu madekwana, bonani kuna kutja! Kowoti kusathu kukayedza banowobe basipo! Ileli ndilo gobe le banotitolela, mbhayilo we banotitapila.