Read Kalanga Isaya 18 Bible Online

Isaya 18 - Kalanga bible

Isaya 18

¹Yee mme wee, shango ye nsindo we mapapilo, iseli kwe njizi dze Itopiya,

²inotumila bamilili nge gungwa, bali mu vula mu zwikepe zwakathamiwa nge shanga dze gwizi! Yendani imwi batumwa bana majatu, ku itjaba tjakakula tjina ganda buyanana, yendani ku bathu banotjiwa pejo na kule, itjaba tjakasima gunokunda, guna shango yakathubukanyiwa nge njizi.

³Imwi mose bagali be lubumbo, imwi mugele mu shango, ha tjilakidzo tjimilidziwa pezhugwi kwe matombo, mulinge! Lunyanga ha gulidziwa muhwe!

⁴Ngoti Yahwe bakati kundili, “Ndowolinga ndilinyelele kudwa mu magalo angu se kupisa kunodwa mu kupenya kwe zhuba, kufanana ne gole le khawa kupisa mu nsi we kuvuna.”

⁵Kowoti kusathu kukavungwa, maluba asinoshashamuka, zhambi dzoyendila kubidwa dzishanyuka, unowothubula thabi tshwa dzinokula nge mipanga inosunulila ebe ekuthubulila pasi thabi dzinopasha.

⁶Bose koga banowosiigwa nyuni dze matombo dzinoja nyama ne zwibandana zwe shango. Nyuni dzinoja nyama dzowopitsha tjilimo nabo dzibaja, zwibandana zose zwe shango zwikapitsha mbaba nabo.

⁷Mu tjibaka itjetjo zwipo zowozhisiwa kuna Yahwe Masimbawose zwizhisiwa nge bathu balefu be ganda buyanana, bathu banotjiwa pejo na kule, ludzi gwakasima gunokunda, be shango yakathubugwanyiwa nge njizi. Banowozha ku Dombo le Ziyoni bugalo gwe zina la Yahwe Masimbawose.