Read Kalanga Isaya 19 Bible Online

Isaya 19 - Kalanga bible

Isaya 19

¹Dama ngekwe Egipiti. Bonani, Yahwe bakatatha gole linolabuka kwazo bezha ku Egipiti, ngono midzimu ye zwifano ye Egipiti inowotetema pabali, Ngono mimoyo ye Baegipiti inowotetema nge kulobgwa nge hana.

²Ngono ndowodzonga Baegipiti kuti bamukilane ne Baegipiti, ngono banowogwa, mmwe ne mmwe egwa ne mwana wa tate babe, ne mbakidzani egwa ne mbakidzani uwe, nzi nkulu ugwa ne mmwe nzi nkulu, mbuso ugwa ne mmwe mbuso.

³Mazwihwo e Baegipiti anowosala kusina tjimuali, ngono ndowoshangashanganya ndongoloso dzabo, ndizo banowobhuzwa midzimu yabo ne ng'anga dzabo ne banolebeleka ne badzimu ne be malipa.

⁴Ngono ndowolonga Baegipiti mu maboko a tetshi nkukutu, mambo unotjisa unowobalaula. Koleba Yahwe Masimbawose.

⁵Vula inowopkhwa mu gungwa ngono gwizi gowowomelela.

⁶Ngolo dze vula dzowonuhwa ne hwobana dze Egipiti dzowopkhwa, shanga dze gwizi ne masengezi kowobola.

⁷Tjekelo ne phili dze gwizi kowobe makwakwa, mu phili dze Naili kowowoma kose kwakadzwagwa mu phili dze Naili kowowoma kukawuluka kukasala kusina tjimwe.

⁸Babhati be hwobe banowolila, bose banoposela zwiweko zwe hwobe mu Naili, bose banoposela njanga dzabo mu Naili banowotemeka mafupa.

⁹Bashingi banothama matyila banowonyalamoyo, banoluka nge thali banowopunamoyo.

¹⁰Ibabo bakabhata thiwa banowopelegwa na bose banoshingila lipiwa banowobe mu buyendasi.

¹¹Balauli be Zoani zwilengwe dumbu, bakumbuludzi ba Faro banopa bukumbuludzi gwe bulengwe. Ungadwa Faro uti, “Ndi nkololo we ntjenjedu, nkololo wa bomambo bantolo”?

¹²Bangayi ngono balume benyu bakatjenjela? Ngabamubudze bamuzibise Yahwe Masimbawose tjabazwimisile kutjithama mu Egipiti.

¹³Balauli be Zoani babe zwilengwe, ne balauli be Memifisi bakatjengedzeka, ibabo banotogwa bali ibo bakabhata njudzi dzayo batungamilila Egipiti ntome.

¹⁴Yahwe bazhisa meya ye kuhwumana muili, ngono bakathama Egipiti kuti idengadenge muna zose zwainoita se nthu walaladza edengadenga mu matho awe.

¹⁵Akuna tjimwe Egipiti tjaingathama, mbeli na shule, lutabi gwe nlala kene lushanga, akuna tjingaidwila.

¹⁶Mu zhuba ilelo Baegipiti banowonga bakadzi, banowotetema nge lutjo mbeli kwe luboko gwa Yahwe Masimbawose gwabanomilidza kubaloba.

¹⁷Ngono shango ye Juda inowotjisa ku Baegipiti, mmwe ne mmwe unowohwa ngekwe Juda unowotja ngekwe tjakazwimisigwa kuthamiwa ndi Yahwe ku bali.

¹⁸Mu zhuba ilelo kowobe kuna mizi mikulu mishanu mu Egipiti inoleba lulimi gwe Kanana ibe ituna kuzwibhatshanya na Yahwe Masimbawose. Mmwe wayo unowodang'wa Nzi nkulu we Zhuba.

¹⁹Mu zhuba ilelo kowobe ne tjibeso tjinopisigwa zwibhayilo tjathamigwa Yahwe pakati kwe shango ye Egipiti, ne bgwe labigigwa Yahwe ku n'gathu wayo.

²⁰Kowobe tjilakidzo ne butendeki kuna Yahwe Masimbawose mu shango ye Egipiti, pabanowolilila kuna Yahwe ngekwe batshambilidzi babo, ngono banowobatumila ntjidzi unowobabakilila kabasunungula.

²¹Ngono Yahwe banowozwizibisa Baegipiti, Baegipiti banowoziba Yahwe mu zhuba ilelo bakabanamata nge zwibhayilo nenge zwipo ngono banowogadzabgwe Yahwe bakabuya bakathama zwababagadzabgwe mu zwili.

²²Yahwe banowoloba Egipiti, beloba bebuya bepodza, ngono banowobgwilila kuna Yahwe, Yahwe banowohwa mitembezelo yabo bakabapodza.

²³Mu zhuba ilelo kowobe ne zila phabi kudwa mu Egipiti kuyenda ku Asiriya, ngono Baasiriya banowozha mu Egipiti, N'egipiti kazha mu Asiriya, ngono Baegipiti banowonamata ne Baasiriya.

²⁴Mu zhuba ilelo Iziraela inowobe ye butatu ina Egipiti ne Asiriya kube nsenya we makombolelo mu shango.

²⁵Yahwe Masimbawose banowobakombolela beti, “Kwakakombolegwa Baegipiti bathu bangu ne Baasiriya nshingo we maboko angu ne Baiziraela thaka yangu.”