Read Kalanga Isaya 2 Bible Online

Isaya 2 - Kalanga bible

Isaya 2

¹Tjakabong'wa ndi Isaya nkololo wa Amozi ngekwe Juda ne Jerusalema yetji,

²Kowoti mu mazhuba anozha Dombo le Ng'umba ya Yahwe lowothumbidziwa likabe gulu kupinda mamwe matombo, lowokudzigwa pezhugwi kupinda matuthu ngono zwitjaba zose zowokulumukila ku lili,

³ngono bathu banjinji banowozha beti, “Buyani titathe dombo la Yahwe tiyende ku Ng'umba ye Ndzimu wa Jakubo, kuti utidiye zila dzawo, kuti ndizo tiyende mu zijana dzawo.” Ngoti nlayo unowodwa mu Ziyoni, dama la Yahwe lowobhuda mu Jerusalema.

⁴Banowosumikilisa pakati kwe zwitjaba bakagadzanya bathu banjinji. Bathu banowothula mathumo abo beathama zwikara zwe mapadza, ne makanu abo bezwithama mipanga inosunulila miti. Itjaba atjitjawosengela tjimwe itjaba mathumo kene kuli kuzwidiyila ngwa.

⁵Be nsha wa Jakubo buyani, tiyende mu tjedza tja Yahwe.

⁶Ngoti makalasha bathu benyu, be nsha wa Jakubo. Ngoti bazhele bakandili banodwa ku bhezhuba, banokandila se Bafilisitiya, bakazwizwadzanya ne bataya.

⁷Shango yabo izhele siliva ne golide, fumwa yabo ayitopela. Shango yabo izhele mbizi, koloyi dzabo dze ngwa adzitopela.

⁸Shango yabo izhele midzimu, banothigamila zwabakathama nge maboko abo, zwakabumbiwa nge zwinyala zwabo.

⁹Ndizo nthu unowoyisiwa pasi, unowolengudziwa. Musibazwiibhatigwe!

¹⁰Ngina mu shongwe, ubgwate mu hwuluba, ubgwatila kutjisa kwa Yahwe, ne tjedza tje bukulu gwabo.

¹¹Banozwikudza banoyisiwa pasi, ne banozwida banowolengudziwa, Yahwe boga ndibo banowokudziwa, mu zhuba ilelo.

¹²Ngoti Yahwe Masimbawose bana zhuba, linowoti bose banozwida ne banozwiyisa pezhugwi, bose koga banozwikudza banoyisiwa pasi,

¹³misida ye Lebanoni, yakakula ikulila pezhugwi, ne mioko ye Bhashani,

¹⁴ne matombo malefu, ne matuthu akamilidzikila pezhugwi,

¹⁵ne thungamakole imwe ne imwe, ne luswingo gumwe ne gumwe gwakasimisiwa,

¹⁶ne ikepe tjimwe ne tjimwe tje Tashishi, ne ikepe tjimwe ne tjimwe tjibuya.

¹⁷Banozwikudza banoyisiwa pasi, ne banozwida banowolengudziwa, Yahwe boga banowokudziwa mu zhuba ilelo.

¹⁸Ngono midzimu inowolobesiwa tjoselele.

¹⁹Bathu banowotizhila mu makuhwu mu shongwe, ne mu mimwina pasi, betizha kutjisa kwa Yahwe, ne tjedza tje bukulu gwabo, ha bemilika kuzunguza shango.

²⁰Mu zhuba ilelo bathu banowolashila midzimu yabo ye siliva neye golide, yabakathama kuithigamila, ku fuku ne kuna bomanlembe.

²¹Banowotizhila mu makuhwu, ne mu phaswa dze shongwe, betizha kutjisa kwa Yahwe, ne tjedza tje bukulu gwabo, ha bemilika kuzunguza shango.

²²Letjani kugalabgwe mu nthu, iye una meya yaanofema mu zwimilo. Nthu ungabaligwa muni kene?