Read Kalanga Isaya 21 Bible Online

Isaya 21 - Kalanga bible

Isaya 21

¹Dama ngekwe tjilambanyika tjipa gungwa. Se tjampupudze tjitutudza mu Negebu, tjita tjozha tjidwa mu tjilambanyika, mu shango inotjisa.

²Ndalakidziwa mbono yakabangalala, ntoleli unotapa, nkolomodzi unokolomola. Elamu, nginilila nge ngwa, Mediya, komba nge ngwa, ndowopedza tjililo tjose tjaakazhisa.

³Ndizo wali ndamanukigwa mu thunji, zwibhayo zwandinabula se nkadzi ali mu zwibhayo zwe kutshibama, ndakawoneswa ngekwe tjandinohwa, ndakanyala moyo ngekwe tjandinobona.

⁴Ndotogwa nge dzungu, ndotetemeswa nge kutja, madekwana andabe ndakashuba kuabona azhisa kutetema ne lutjo kundili.

⁵Banolulwamisa pabanojila, bewala thobgwana dzabanogala, bebe beja beng'wa. Milikani imwi balauli muzhodze zwiviko zwenyu mafuta!

⁶Ngoti She bakati kundili, “Yenda unobiga nlindi, un'dwe alebe tjaanobona.

⁷Ati ebona bataswi, bakataswa mbizi beyenda bakabapa, ne bakataswa madonki, ne bakataswa kamela, ngaahwilile, ahwilile kwazo.”

⁸Ipapo nlindi kamilidza hwi kati, “She zhuba ne zhuba ndogala ndima pezhugwi kwe ngadzi, pa nshingo wangu ndipo pandinoma busiku gose.

⁹Ngono bonani, aba bataswi banozha, bataswi be mbizi baswika bakabapa!” Kashandula eti, “Yawa, yawa Bhabhiloni, ngono midzimu yawo yose ye zwifano wayi pkhwanyila pasi.”

¹⁰Imwi bathu bangu bakashokogwa, bakawulusiwa, tjandahwa tjidwa kuna Yahwe Masimbawose, Ndzimu we Iziraela ndomubudza itjo.

¹¹Dama nge kwe Duma. Mmwe unondidana kudwa ku Seiri eti, “Nlindi busiku gwakatini? Nlindi busiku gwakatini?”

¹²Nlindi kadabila eti, “Mangwanana aswika ne busiku gwaswika. Ha ungabhuzwa, bhuzwa, ngono ubuye kakale.”

¹³Dama ngekwe Arabiya. Imwi nlongolongo we koloyi dze Badedani mokotokela mu zwishakana zwe Arabiya.

¹⁴Muzhile vula bana nyota, mupe batizhi zojiwa imwi bagali be Tema.

¹⁵Ngoti bakatizha thumo, thumo labakamilidziwa ne dati lakapetiwa, betizha ngwa yakabangalala.

¹⁶She bakalebeleka nami bakati, “Kowoti mu gole ling'ompela gudzo le Kedari likapela, tibala gole tilizanya nge gole linobaligwa ntapiwa unoshinga.

¹⁷Balume bakasima, bakololo ba Kedari banobhayana nge misebe, bakasala banowobe bali bashomanana, ngoti Yahwe, Ndzimu we Iziraela walebeleka.”