Read Kalanga Isaya 22 Bible Online

Isaya 22 - Kalanga bible

Isaya 22

¹Dama ngekwe nkuku we mbono. Modwani ha muti matathila pezhugwi, imwi mose, ku zwilungwane zwe ng'umba,

²imwi muzhele zhoba, nzi nkulu we phipiti, una kushatha kwakapindilila. Bafi benyu abazobulawa nge thumo, naiko abazofa mu ngwa.

³Batungamili benyu bose bakatizha tjibaka tjing'ompela, bakatapiwa kusingashingisiwe nsebe. Bose benyu bakawang'wa bakatapiwa, nenguba bakabe batizhila kule.

⁴Ndizo ndakati, “Lingani ntome kusikundili, muletje ndilile tjililo tjinogwadza, musigwise kundinyaladza mu kupaladziwa kwe nkololokadzi we bathu bangu.”

⁵Ngoti She Yahwe Masimbawose bana zhuba le phipiti ne kutshambatshambana ne kuhwumana mu nkuku we mbono, nele kuligwa kwe makuma ne tjililo tjohwika ku matombo.

⁶Elamu yakasenga gobhodo le misebe, ina koloyi dze ngwa ne babhayani bakatatha mbizi, Kiri yakabhata tjiviko.

⁷Mikuku iyo yakanaka izhele koloyi dze ngwa, be mbizi bakama nge mamo abo ku mikoba.

⁸Mbakililo dze Juda dzakadusigwa kutjena. Mu zhuba ilelo wakalinga ku zwibhayano zwiku Ng'umba ye Ishaka,

⁹ngono ukabona kuti mabuli manjinji guma palakakwamuka mu nzi nkulu wa Dafite ngono ukatjelela vula mu dziba litjapasi.

¹⁰Wakabala ng'umba dze Jerusalema, ngono ukapkhwanya ng'umba kusimisa guma.

¹¹Wakabaka tshime pakati kwe makuma kuti vula ye dziba gulukugwi iwungile mulili. Koga awuzotongobe ne tjimwe ngekwe wakalithama, kene kube ne njele ngekwe wakathama ndongoloso ntolo.

¹²She Yahwe Masimbawose mu zhuba ilelo bakakudana kuti ulile ube mu buyendasi, kuti utesele nsholo uambale tjiambalo tje saka.

¹³Ngono akuzobe saikoko, koga kwakabe ne kushatha ne mizano, kubhayiwa ng'ombe ne pkhwizi, kujiwa nyama kung'wiwa nkumbi we zhambi. Kuyi, “Ngatijeni ting'weni ngoti mangwana tofa.”

¹⁴Yahwe Masimbawose bakalebeleka mu zebe dzangu beti, “Nge malebeswa jinyo ileli alitowozwiibhatigwa kudzina ufa.” Kojalo Yahwe Masimbawose.

¹⁵She Yahwe Masimbawose bakati, “Yenda ku ntjengeti iwoyu, kuna Shebina ntjengeti we mbako dze bushe, ngono un'dwe uti,

¹⁶Unothamani ipapa kakale ndiani wakupa ndetjedzelo dze kutsha ikumbu tjitjo ipapa uzwitshila ikumbu pezhugwi, ubezha magalo awo e kunyaluluka mu shongwe?

¹⁷“Yahwe banowokuposela kutjena nge masimba, iwe nlume wakasima. Banowokubhata nge masimba.

¹⁸Banowokudzunguludza kwazo se bola bakakuposela mu shango phabi. Unowofila ikoko, koloyi dzidzo dze ngwa dzaunozwikudza ndidzo dzowogala ikoko. Unobhatisa shoni ng'umba ya tetshi uwo.

¹⁹Ndowokutata mu nshingo uwo, unowodusiwa mu mamo awo.

²⁰“Mu zhuba ilelo ndowodana nlanda wangu Eliyakimu nkololo wa Hilikiya,

²¹ndowombadza zwiambalo zwizo ansunga thunji nge mwandabula uwo. Ndowompa simba lilo, ngono unowobe tate ku bagali be Jerusalema ne ku ng'umba ya Juda.

²²Ndompa kiyi ye ng'umba ya Dafite, unoti azhula, kukasibe ne ungazhalila, ha azhalila, kukasheta ungazhula.

²³Ndowon'simisa kanga lubambo gwakothomegwa pagwakafanila. Unowobe tjigalo tje bushe tje gudzo mu ng'umba ya tate babe.

²⁴Ludzi gwa tate babe gose gowobe mu mathudzi awe, bazekulu ne zwizekugwana, ne zwija zose zwitukununu, kudwa ku kopi kunoti ku hali.”

²⁵Mu zhuba ilelo, Koleba Yahwe Masimbawose. “Lubambo gwakakothomegwa gukasima pakalingisana gowoshomoka, gowothubugwa gukawa, ngono ntolo wagwakabe gwakasenga unowowila pasi. Yahwe balebeleka.”