Read Kalanga Isaya 23 Bible Online

Isaya 23 - Kalanga bible

Isaya 23

¹Dama ngekwe Tire. Ambani imwi zwikepe zwe Tashishi, ngoti Tire ya kolomogwa, yasiyiwa isina ng'umba kene mamilo e zwikepe. Thawu yedzi badzizumbunuligwa kudwa ku Khitimu.

²Nyalalani imwi bagali be tjekelo dze gungwa, imwi baseenyi be Sidoni; imwi makafumisiwa nge bapindi nge gungwa.

³Nge gungwa mathunde e Shiho akazha kumuli, ne zwivuno zwe Naili. Makabe baseenyeli be zwitjaba, fumwa yenyu yakazhisiwa ndiko ikoku.

⁴Bhakhwa nge shoni iwe Sidoni ngoti gungwa gwalebeleka, gungwa gwakasima gukati, “Andizotongobe mu zwibhayo kene kuli kutshibama, andizotongo lela bazhuzha kene baanadi.”

⁵Zibiso inowoti iswika mu Egipiti, banowonging'wa nge buyendasi nge zibiso ngekwe Tire.

⁶Tjulukilani ku Tashishi, ambani imwi bagali be tjekelo dze gungwa!

⁷Apa iwoyu ndiwo nzi wenyu nkulu wakamilidzika, Wakabepo mu mazhuba antolo, wakabe ne makumbo akausenga ukanoti kule kene?

⁸Ndiani wakalongolosela kukolomodza Tire, nzi nkulu we zwiala zwe bushe, wakabe baseenyi bawo bali bana be bumambo, bashabi bawo bali banolumbidziwa mu shango kene?

⁹Yahwe Masimbawose ndibo bakalongolosa, kukolomodza kuzwida kwe gudzo lose, kusalumbidza kose kulumbidziwa kwe shango.

¹⁰Zhalani shango yenyu se gwizi gwe Naili imwi bakololokadzi be Tashishi, akutjina kutjina kuzwidziba.

¹¹Bakatambunudzila luboko gwabo pezhugwi kwe gungwa, bakazunguza mibuso, Yahwe bakadusa ndayo ngekwe Kanana kukolomodza mbako dzayo dze matizhilo.

¹²Ngono bakati, “Aungatjabe mu kushatha kwe kuzwikudza, iwe mwanadi we Sidoni, milika upindile ku Sipurasi, naikoko autowowana kunyaluluka.”

¹³Bonani shango ye Bakhaladiya, ibaba bathu bakabe basitjimwe Asiriya yakaithama ikabe bugalo gwe phuka dze tjilambanyika, bakabaka thungamakole dzabo, bakakolomodza mbako dzayo dze bumambo, bakankolomodza akabe matongo.

¹⁴Ambani imwi zwikepe zwe Tashishi, ngoti matizhilo enyu akolomogwa.

¹⁵Ngono kowoshingikala mu zhuba ilelo kuti Tire ikanganike kwe makole ali makumi ali kutendeka, se mazhuba e butjilo gwa mambo ng'ompela. Shule kwe makole ali makumi ali kutendeka Tire unowonga tjimu lumbo gwe fukula gunoti,

¹⁶“Tola dende uyendayende mu nzi nkulu, iwe fukula yakakanganika! Umbe kunozipa, umbe njimbo njinji, kuyita kuti ukumbugwe.”

¹⁷Ku bupelo gwe makole ali makumi ali kutendeka Yahwe banowokumba Tire ngono inowobgwilila ku nshingo wayo ndizo inowofukula ne mibuso yose ye shango.

¹⁸Mbuyilo iye ne tjaalipiwa nditjo zowopiwa Yahwe, atjitowobiganyiwa kene tjikasumbikwa, koga mbuyilo iye inowoshingisiwa kuwanila ibabo banoshingila Yahwe zojiwa ne zwiambalo zwakana.