Read Kalanga Isaya 24 Bible Online

Isaya 24 - Kalanga bible

Isaya 24

¹Bonani Yahwe banowokolomodza shango bakaithukudza, banowotjinya ndingiko yayo ngono bakapaladza bagali bayo.

²Tjinowoshingikalila bathu ne bapirisiti tjowobashingikalila, tjinowoshingikalila nlandalume na tetshi uwe tjowonshingikalila, tjinowoshingikalila nlandakadzi na tetshikadzi uwe tjowonshingikalila, tjinowoshingikalila ntengi ne ntengesi tjowonshingikalila, tjinowoshingikalila n'adzimiwa ne n'adzimi tjowoshingikalila, tjinowoshingikalila nkoloti ne nkolotiwa tjowoshingikalila.

³Shango yose inowokolomodziwa nge buzhalo ikasala ili dongo zwakwako. Ngoti Yahwe ndibo baleba dama ileli.

⁴Shango inowomelela, inotimbama, lubumbo gopela masimba, gofa, lubumbo gopela masimba gofa, banokudziwa banopela masimba.

⁵Shango yatemapadziwa ne bagali bayo, ngoti bakatjuluka milayo, bakaleyanya ndaulo, bakatjinya tjidumano tjisingapele.

⁶Ndizo wali bhiso laja shango, bagali bayo banodziyila ngekwe milandu yabo, ndizo bagali be shango banotshwa bepela, kwasala bathu bashomanana.

⁷Nkumbi we zhambi unopela, nzhambi iwo watimbama, bose babe mimoyo yakashatha bobubula.

⁸Kulila kwe thamborini akutjahwika, zhoba ye bakashatha yanyalala, kulila kwe dende kwapela.

⁹Abatjang'wa nkumbi nge njimbo, tjing'o tjakabila tjobabila ibo banotjing'wa.

¹⁰Nzi nkulu we phipiti wakwamukana ukawila pasi, nkoba we ng'umba imwe ne imwe wazhaligwa kuti kushaye wangina.

¹¹Kuna tjililo mu dzizila tjinoshaka nkumbi; kushatha kose kwaswika mu bhelelo lako, mipululu yose ye shango yapela.

¹²Kwasala kuthukudzika mu nzi nkulu, mazhalilo awo akavunikana.

¹³Ngoti kowoshingikala saikoku mu shango ne pakati kwe zwitjaba, kowonga ntoba wapugwa, kukanga manungidzila e zhambi asala mukutjegwa kwadzo.

¹⁴Banomilidza mahwi abo bemba nge kushatha, bembila bukulu gwa Yahwe bedwa ku golombedzo.

¹⁵Ndizo wali ne ku bhezhuba kudzani Yahwe, imwi bamu shango dzimu tjekelo dze gungwa, kudzani zina la Yahwe Ndzimu we Iziraela.

¹⁶Kudwa mu phelelo dze shango tohwa njimbo dze gudzo kunaiye Wakayengemala N'gompela. Koga ati, “Ndanyala moyo! Ndanyala moyo! Yee mme wee! Ndapalala! Batjebeli banotjebela! Batjebeli banotjebela.”

¹⁷Kutja ku namwi ne makomba ne matati, imwi bagali be shango!

¹⁸Kowoti iye unotizha nsindo unotjisa kawila mu gomba, naiye unotatha ebhuda mu gomba kabhakhwa nge dati. Mikoba ye kudzimu yakazhuka, thiwa dze shango dzotengenyeka.

¹⁹Shango yakathukudzika dumbu, shango yakashakala, shango yazunguzika kwazo.

²⁰Shango inotshatsharika se nthu wakalaladza, inodengadenga se thumba. Matjinyo ayo anoilemela, ngono inowa kwaisingawotjamuka.

²¹Mu zhuba ilelo Yahwe banowoloba mibunga ye kudzimu ikweno pezhugwi, bakaloba bomambo be shango mu shango.

²²Banowokubunganyigwa pathu pang'ompela se basungwa bekubunganyigwa mu gomba, banowozhaliligwa mu ng'umba ye busungwa, shule kwe mazhuba manjinji banowolobgwa.

²³Mwedzi unowohwumana, zhuba ilo likabhakhwa nge shoni, ngoti Yahwe Masimbawose banowobusa mu Dombo le Ziyoni ne mu Jerusalema na mbeli kwe sholotjena banowobona gudzo la Yahwe.