Read Kalanga Isaya 25 Bible Online

Isaya 25 - Kalanga bible

Isaya 25

¹Imwi Yahwe, imwi mu Ndzimu wangu, Ndowomukudza, ndowolumbidza zina lenyu, ngoti makathama zwithu zwinotjenamisa, ndongoloso dzakathamiwa ntolo dzogalikabgwe, dzi malebeswa.

²Ngoti makathama nzi nkulu duluthulu, nzi nkulu we matizhilo ukabe dongo, ka nzinda mu bataya akutjina nzi nkulu, awungatjamusiwe kakale.

³Ndizo wali bakasima banowomukudza, mizi mikulu ye zwitjaba zwakabangalala inowomutja.

⁴Ngoti makabe dizhilo ku bashayi, dizhilo le basheti mu buyendasi gwabo, mukabe mbakililo mu matutu akasima ne ntutshi mu nsi we kupisa. Ngoti kunginilila kwe bakabangalala kunga dutu lakasima liloba guma,

⁵kukanga kupisa mu magalo akawoma. Imwi monyaladza zhoba ye bataya, se kupisa kupedziwa nge ntutshi we makole, ndizo lumbo gwe bakabangalala gwanyalala.

⁶Mu dombo ileli Yahwe Masimbawose banowothamila bathu bose nzano we zojiwa zwakanaka, nzano we nkumbi unozipa, we zwakakola zwina mongo, nkumbi unozipa.

⁷Mu dombo ileli Yahwe banowokolomodza dandi lakatandila bathu bose, tjisitilo tjakafukidziwa njudzi dzose.

⁸Banowolobesela lufu tjose, She Yahwe banowobukusha mishodzi mu njiso dzose bebe bedusa kulengudziwa kwe bathu babo mu shango yose. Koleba Yahwe.

⁹Mu zhuba ilelo kowoyi, “Bonani, Ndzimu wedu ihwoyu, takabe takaulindila, kuti utitjidze. Ndi Yahwe ibaba, batakabe takalindila, ngati shatheni tipululudze mu jidzo labo.”

¹⁰Ngoti luboko gwa Yahwe gowogala pezhugwi kwe dombo ileli, koga Moabu inowotshambigwa pasi mu magalo ayo se mashanga etshambiwa mu gomba le nthudze.

¹¹Banowotambunudza maboko abo pakati kwawo se mbhukutji etambunudza maboko awe kubhukutja, koga Yahwe banowoyisa pasi kuzwida kwabo ne bunyambi gwe maboko abo.

¹²Matizhilo abo akasima malefu banowotshindika makuma awo bakaaligila pasi mu hwuluba.