Read Kalanga Isaya 26 Bible Online

Isaya 26 - Kalanga bible

Isaya 26

¹Mu zhuba ilelo kowombiwa lumbo wogu mu shango ye Juda; “Iswi tina nzi nkulu wakasima, Ndzimu unobakilila nge jidzo lawo se makuma ne makuma e mbakililo.

²Zhulani mikoba kuti itjaba tjakalulwama tjinolondolodza malebeswa tjingine mukati.

³Mon'dzikamisa mu kunyalala kwakapelela iye una meya iye igele mu muli, ngoti unogalikabgwe mu muli.

⁴Galabgwe muna Yahwe nge kusingapele, ngoti Yahwe Ndzimu i shogwe isingapele.

⁵Bakayisa pasi bagali be nzi nkulu u zhuzhugwi wakamilidzika. Banoyisa pasi, banowulashila pasi mu hwuluba.

⁶Gumbo lowutshamba, makumbo e bashayi, thambo dze basheti.”

⁷Zila ye nlulwami ayina makomba, mothama zila ye nlulwami ikalizalizana.

⁸Kakale mukusumikilisa takalindila imwi Yahwe, yemula dze meya yedu dzimu zina lenyu.

⁹Meya yangu inomushuba busiku, meya yangu inomushaka nge moyo wangu wose, inowomushaka kwazo nge mazhokuyedza. Ngoti kusumikilisa kwenyu ha kuli mu shango, bagali be lubumbo banozwidiya ndulamo.

¹⁰Ha mbiimbi angahwigwa ngoni, aatozwidiya ndulamo, ne mu shango ye bakatambunuka unotjinya, aatobona bukulu gwa Yahwe.

¹¹Imwi Yahwe, luboko gwenyu gwakamilidzika, koga abatogubona. Ngababone kupisikila bathu benyu kwenyu, ngono babhakhwe nge shoni. Letjani moto we zwita zwenyu ubaje.

¹²Imwi Yahwe mowotipa kunyalala. Makatishingila mishingo yedu yose.

¹³Imwi Yahwe Ndzimu wedu, bamwe boshe basi imwi bakatibusa, koga zina lenyu loga ndilo latinokudza.

¹⁴Bakafa, abangatjile, bakafa abangamuke, ndizo makabaloba mukabalobesa mukabukusha ikumbuludzo nge kwabo.

¹⁵Koga imwi makawatsha itjaba imwi Yahwe, makawatsha itjaba, imwi mokudziwa, imwi makatalabudza migathu ye shango.

¹⁶Imwi Yahwe bathu benyu bakamushaka bali mu buyendasi, bakazwipa betembezela tjibaka tjamakabe mu batjemela.

¹⁷Takanga nkadzi wakazwisenga tili mbeli kwenyu, unolila ali mu zwibhayo, mbili uwe usingadzikame ngoti abe pejo ngotshibama, takalingika takajalo mu mesho enyu imwi Yahwe.

¹⁸Takabe takazwisenga, tili mu zwibhayo koga kukanga se tatshibama phepo. Akuna jidzo latakazhisa mu shango, atizozwala bathu be shango.

¹⁹Bafi benyu banowotjila, mibili yabo inowomuka. Imwi bamu hwuluba, mukani mumbe mupululudze! Ngoti khawa yenyu inonga khawa ye mangwanana, shango inowotshibama bafi bayo.

²⁰Bathu bangu yendani munongina mu ng'umba dzenyu muzwizhalilile, mubgwate kwe tjibakana kuswikila bushongola gwabo gupela.

²¹Lingani, Yahwe banozha bebhuda mu bugalo gwabo kuloba bagali be shango ngekwe matjinyo abo. Ngono shango inowolakidza malopa akatebugwa muili, aingabe itjasumbika bakabulawa muili.